SİYASƏT
Ermənistan silahlı qüvvələrinin nəzarəti altında olan Azərbaycan ərazilərində təbii sərvətlərin qiymətləndirilməsinə başlanılıb
Bakı, 16 iyul (AZƏRTAC). Azərbaycan Respublikası ərazilərinin Ermənistan silahlı qüvvələri tərəfindən işğalı nəticəsində məruz qalınan itki və tələfatların qiymətləndirilməsi üzrə İşçi Qrupunun növbəti toplantısı keçirilib.
Qrupun üzvlərinin və qiymətləndirmə üzrə dəvət olunmuş mütəxəssislərin iştirakı ilə keçirilmiş toplantıda Ermənistan silahlı qüvvələrinin nəzarəti altında olan Azərbaycan ərazilərində təbii sərvətlərin qiymətləndirilməsi məsələsi müzakirə edilib.
Həm də hesabat xarakteri daşıyan toplantıda qrupun geologiya üzrə mütəxəssisi Mirzəli Fətəliyevin məruzəsi dinlənilib. Müzakirələr zamanı qrupun Ekologiya və Təbii Sərvətlər Nazirliyinin nəzdində ətraf mühit və təbii sərvətlərə dair İnformasiya-Arxiv Fondunun materialları əsasında qiymətləndirilməsi üçün məqbul olan baza sənədlərinin tam surətdə kifayət edəcəyi qənaətbəxş hesab olunub. Beləliklə, işğal altında olan ərazilərdə təbii sərvətlərimizə dəyən zərərin qiymətləndirilməsinə başlanılıb.