FİFA HƏR İL ƏN GÖZƏL QOLA GÖRƏ MÜKAFAT TƏQDİM EDƏCƏKDİR
Bakı, 21 oktyabr (AZƏRTAC). Beynəlxalq Futbol Federasiyası hər ilin sonunda ən gözəl qolun müəllifinə məşhur macar hücumçusu Ferents Puşkaşın mükafatını təqdim edəcəkdir.
Bunu FİFA-nın prezidenti Zepp Blatter “Real”ın əfsanəvi forvardının şərəfinə adlandırılmış Budapeşt Futbol Akademiyasında bildirmişdir. O demişdir: “Tarixdə iz qoymuş dahi futbolçuların xatirəsi əbədiləşdirilməlidir”.
İlk dəfə mükafat dekabrın 21-də İsveçrədə, FİFA versiyası ilə ən yaxşı futbolçunun müəyyən edilməsinə həsr olunmuş mərasimdə təqdim olunacaqdır.
Namizədlərin adları hələlik elan olunmamışdır. 2008-ci ilin iyunundan 2009-cu ilin mayınadək ən gözəl qollar vurmuş oyunçular bu siyahıya düşə bilərlər. FİFA-nin ekspertləri namizədləri oyunların səviyyəsinə görə seçəcəklər. Bundan əlavə, qol təsadüfi uğurlu gedişin və ya rəqibin səhvinin nəticəsi olmamalıdır.
Bölmənin digər xəbərləri
