FRANSA DÜNYA ÇEMPİONATINDA AZƏRBAYCAN KOMANDASININ HESABINDA İLK GÜMÜŞ MEDAL
Paris, 22 oktyabr ( AZƏRTAC ). Parisin Pyer de Kubertən stadionunda 17-20 yaşlı gənclər arasında cüdo üzrə 15-ci Dünya çempionatına start verilmişdir.
Oktyabrın 22-də cempionatın təntənəli açılış mərasimində Beynəlxalq və Fransa cüdo federasiyalarının sədrləri Marius Vizer və Jan Lük Ruj idmancıları salamlamış, ayın 25-dək davam edəcək yarışlarda 75 ölkədən 500 idmançının, 17 hakim və 20 idman komissarının iştirak etdiklərini diqqətə çəkmiş, idmançılara müvəffəqiyyətlər arzulamışlar.
Yarışlarda Azərbaycanı 9 idmançı təmsil edir.
Yarışların ilk günü Ülviyyə Vəliyeva (48 kq), İlqar Müşkiyev (55 kq) və Rasim Əsədullayev (60 kq) öz qüvvələrini sınamışlar. Ü.Vəliyeva və R.Əsədullayev elə ilk görüşdə rəqiblərinə məğlub olaraq yarışı dayandırmışlar. 2009-cu ildə Yerevanda keçirilmiş yarışlarda ölkəmizin idman şərəfini layiqincə qorumuş və mükafata layiq görülmüş İlqar Müşkiyev dörddəbir finalda amerikalı, yarımfinalda isə braziliyalı rəqiblərinə böyük üstünlüklə qalib gələrək finala vəsiqə qazanmışdır. O, finalda yaponiyalı rəqibi ilə mübarizədə kobudluğa yol verdiyinə görə cüzi hesabla rəqibinə uduzsa da, komandamızın hesabına ilk gümüş medal qazandıra bilmişdir.
Yarışlar davam edir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
