Fransa XİN rəhbəri İraqın sabitliyinin qorunmasının vacibliyini vurğulayıb
Paris, 6 fevral, AZƏRTAC
Fransanın xarici işlər naziri Jan-Noel Barro bildirib ki, İraqın sabitliyi və təhlükəsizliyinin qorunması xüsusi əhəmiyyət daşıyır.
Suriya səfərindən sonra regional təmaslarını davam etdirən Jan-Noel Barro İraqın paytaxtı Bağdada gəlib. O, burada İraqın xarici işlər naziri Fuad Hüseyn ilə görüşüb və birgə mətbuat konfransında çıxış edib.
Nazir qeyd edib ki, son bir il ərzində İraqa ikinci dəfə səfər edir: “Bu, həm tərəfdaşlığımızın gücünü və keyfiyyətini, həm də Fransanın İraqla rəsmi dialoqun davam etdirilməsinə verdiyi əhəmiyyəti göstərir”.
AZƏRTAC xəbər verir ki, regionda, xüsusilə İraqın ətrafında mövcud olan gərginliklərə diqqət çəkən Barro bunun hərbi eskalasiya riski yaratdığını və terror təşkilatı İŞİD-in yenidən fəallaşmasına yol aça biləcəyini vurğulayıb. O bildirib ki, Suriya və İraqa səfəri İŞİD-ə qarşı mübarizə çərçivəsində üzərinə düşən məsuliyyətdən irəli gəlir: “Fransızların təhlükəsizliyi məhz burada – İraqda və Suriyada təmin olunur”.
Barro xatırladıb ki, fransız hərbçiləri terrorla mübarizə çərçivəsində İraq təhlükəsizlik qüvvələri ilə çiyin-çiyinə fəaliyyət göstərirlər.
Suriyadakı vəziyyətə toxunan Fransa XİN rəhbəri yanvarın 30-da Dəməşq hökuməti ilə terror təşkilatı YPG arasında imzalanmış atəşkəs razılaşmasını məmnunluqla qarşıladıqlarını bildirib. O əlavə edib ki, Fransa və İraq Suriya cəmiyyətinin bütün təbəqələrini əhatə edən dinc və inklüziv keçid prosesinin dəstəklənməsi, eləcə də İŞİD-ə qarşı mübarizənin davam etdirilməsi məsələsində həmfikirdirlər.
Barro vurğulayıb ki, İraq Suriyanın şimal-şərqindən öz ərazisinə köçürülən minlərlə məhbusu qəbul etməklə mühüm rol oynayır və bu kontekstdə Bağdadın Fransanın dəstəyinə arxalana biləcəyini qeyd edib.
Nazir, həmçinin Fuad Hüseyn ilə görüşdə İranla bağlı vəziyyətin də müzakirə olunduğunu bildirib.
Fransa XİN rəhbəri bildirib ki, Paris təhlükəsizlik maraqlarını və İran xalqının fundamental hüquqlarını nəzərə almaqla, danışıqlar yolu ilə həllə yönəlmiş bütün diplomatik səyləri tam dəstəkləyir.
Barro bu iki amilin İraqın bərpası üçün həlledici əhəmiyyət daşıdığını və region üçün ümid mənbəyi olduğunu qeyd edərək, davamlı sabitliyin və uzunmüddətli sülhün təmin edilməsi istiqamətində səylərin davam etdirilməsinin vacibliyini vurğulayıb.
Sonda nazir şərait imkan verdiyi halda 3-cü Bağdad Konfransının birgə təşkili üzərində işləmək barədə razılığa gəldiklərini bildirərək, regionda xarici müdaxilələrdən uzaq, güclü və suveren dövlətlər görmək istədiklərini qeyd edib.
Bölmənin digər xəbərləri
