Fransa Yay Olimpiya Oyunlarından siyasi alət kimi istifadə edir- RƏY
Bakı, 31 iyul, AZƏRTAC
2024-cü il Paris Yay Olimpiya Oyunlarının açılış mərasimində Azərbaycanla bağlı təxribata yol veriləcəyi gözlənilən idi. Ermənistana hamilik edən Fransa ölkəmizə qarşı qərəzini, kinini “sülh və ümid” şüarı ilə keçirilən idman yarışında da ört-basdır edə bilmədi. Bu dəfə Paris "France 2" telekanalını önə verərək Azərbaycanın nüfuzunu ləkələməyə çalışdı, bizi təcavüzkar ölkə kimi dünyaya təqdim etdi. Bacardılarmı? Xeyr! Cüdoçumuz Hidayət Heydərov ötən gün finalda fransalı Joan Benjamen Qabanı məğlub edərək Olimpiya çempionu oldu. İdmançımız qalib gəlsə də, fransalı rəqibini qucaqlayıb alnından öpdü və bütün dünyaya Azərbaycanın gücünü, idman mədəniyyətini, humanistliyini göstərdi. Onun qələbəsi nəticəsində səsləndirilən Azərbaycanın Dövlət Himninə fransızlar qulaq asmalı oldular.
Bu sözləri AZƏRTAC-a açıqlamasında politoloq Ramiz Alıyev söyləyib.
Politoloq bildirib ki, Fransa televiziya kanalı siyasi qərəz nümayiş etdirməklə Olimpiya Xartiyasının əsas prinsiplərini, jurnalistika etikasını pozub. Fransa Yay Olimpiya Oyunlarından siyasi alət kimi istifadə edir. Olimpiya Oyunlarının açılışından canlı yayım edən telekanalın aparıcıları erməni idmançılarını təqdim edərkən “dostlarımız, tarixən fransızların qəlbinə yaxın olan ölkə, erməni xalqı üçün Dağlıq Qarabağın Azərbaycan Ordusu tərəfindən süqutu ilə ağır bir il oldu” kimi təxribatçı ifadələr səsləndirdilər. Aparıcı Azərbaycan idmançılarını təqdim edəndə isə “ərazi məsələsində Ermənistanla toqquşan Qafqaz respublikası” dedi. Sirr deyil ki, bu cür ifadələr tamaşaçıların şüurunda, yaddaşında Azərbaycanla bağlı neqativ fikirlər, təəssüratlar yaradır. Şübhə etmirik ki, aparıcının çıxışı Yelisey sarayında hazırlanıb. Onlar yuxarıdan verilən təlimata uyğun olaraq siyasi riyakarlığa əl atıblar, hikkəli ifadələrdən istifadə ediblər. Almaniyada futbol üzrə Avropa çempionatında "Bozqurd" işarəsi göstərdiyi üçün türkiyəli idmançı Merih Demiralı cəzalandıran Qərb “France 2” telekanalının təxribatlarına göz yumur.
“Azərbaycanın dünya idman ictimaiyyəti qarşısında təcavüzkar ölkə kimi təqdim edilməsi, ərazi bütövlüyümüzün şübhə altına alınması bizi bir millət, dövlət olaraq aşağılanmağımıza hesablanıb. Artıq Azərbaycanın Gənclər və İdman Nazirliyi, Milli Olimpiya Komitəsi Beynəlxalq Olimpiya Komitəsinə müraciət ünvanlayıb. Fransanın Birləşmiş Millətlər Təşkilatının bir neçə qətnaməsini, o cümlədən Olimpiya Xartiyasının əsas prinsiplərini kobud şəkildə pozması müraciətdə öz əksini tapıb. Dünyada idmanı təbliğ etməli və Olimpiya Hərəkatına rəhbərlik etməli olan Beynəlxalq Olimpiya Komitəsinin digər missiyası da idmana və idmançılara qarşı hər hansı siyasi, yaxud kommersiya istismarına qarşı çıxmaqdır. Komitə "France 2" telekanalının canlı yayımda Azərbaycan komandasının ünvanına təxribat xarakterli ifadələr işlətməsinə biganə qalmamalıdır. Avropa sivilizasiyasına ləkə olan belə addımların qarşısı vaxtında alınmalıdır. Bu gün Azərbaycan bütün Avropa ölkələri ilə tərəfdaşlıq edir. Bizim bu il Paris Yay Olimpiya Oyunlarında iştirakımız da bu əməkdaşlığın sübutudur. Təəssüf ki, bütün iştirakçılara bərabər imkanlar yaratmağa borclu olan Parisin atdığı addımlar bizə Avropanın orta əsrlər tarixini xatırlatdı. Parisdə Olimpiadanın açılış mərasimində göstərilən məlum biabırçılıq, əslində, Fransa dövlətinin mənsub olduğu siyasi və mənəvi düşüncənin, təfəkkürün, nihilizmin təzahürüdür. Bu yolla onlar ölkələrində qurmaq istədikləri "gələcəyi", "yeni cəmiyyəti" insanlara nümayiş etdirirlər. Görünür, Fransa üçün milli ləyaqətə ehtiram, başqasının milli maraqlarına hörmət çoxdan arxa plana keçib”,-deyə R.Alıyev vurğulayıb.
Politoloq əlavə edib ki, Emmanuel Makronun yarıtmaz siyasəti nəticəsində Fransa dünyada, o cümlədən regionumuzda nüfuzunu itirməkdə davam edir. Bu, özünü Olimpiya Oyunlarının rəsmi açılışı mərasimində də göstərdi. Məhz E.Makronun və onun komandasının qərəzli, təxribat xarakterli siyasi fəaliyyəti ucbatından bir vaxtlar azərbaycanlıların ən çox sevdiyi, pərəstiş etdikləri ölkələrdən olan Fransa bu gün siyasi çirkablarla, kin-küdurətlərlə dolu bir düşmən obrazında özünü təcəlla edir.
Bölmənin digər xəbərləri
