Fransanın əsl siması Afrikada üzə çıxıb - RƏY
Bakı, 5 oktyabr, AZƏRTAC
Fransada artıq Fransua Mitteran, Jak Şirak kimi klassik və dünya siyasətinin dərinliklərini bilən, müdrik siyasi xadimlər yoxdur. Onların yerinə gələn Emmanuel Makron kimi populist siyasətçilər yalnız qrup maraqlarına xidmət edərək, qlobal siyasi proseslərə dar çərçivədən baxırlar.
Bu fikri AZƏRTAC-a müsahibəsində Milli Məclisin deputatı Sadiq Qurbanov bildirib. O, nəzərə çatdırıb ki, hazırda Fransa hakimiyyəti seçici qazanmaq üçün özünü “humanist”, “insanpərvər” kimi göstərməyə və ictimaiyyət arasında nüfuz qazanmağa çalışır.
Deputatın sözlərinə görə, bu günlərdə Ermənistanda səfərdə olan Fransanın xarici işlər naziri Katrin Kolonnanın verdiyi bəyanatlar və səsləndirdiyi fikirlər onu deməyə əsas verir ki, Ermənistan “yağışdan çıxıb, yağmura düşmək” istiqamətində sürətlə irəliləyir:
“Ermənistanın baş nazirinin Qarabağı könüllü tərk edən ermənilərə qarşı Azərbaycan əsgərləri tərəfindən heç bir kobud rəftarın olmadığını bəyan etdiyi halda, K.Kolonnanın tamamilə əks fikir söyləyərək Azərbaycanı ittiham etməsi, artıq rəsmi Parisin qeyri-konstruktiv siyasət yürütməsindən xəbər verir.
Bu gün Fransanın daxili və xarici siyasətdəki vəziyyətinə və beynəlxalq imicinə nəzər yetirsək, onun bərbad olduğunu görərik. Afrikadan qovulmaqla yanaşı, Fransa əhalisi sosial-iqtisadi cəhətdən çox əziyyət çəkir. İlin əvvəlində “sarı jiletlilərin” kütləvi çıxışları zamanı polisin törətdiyi qəddarlıq, köçkünlərə qarşı qanunsuz davranış və polisin bir gənci qətlə yetirərək cəzasız qalması hakimiyyətin sürətlə süquta uğramasını deməyə əsas verir.
Bütün bunları kompensasiya etmək üçün Makronun rəhbərlik etdiyi Fransa Ermənistanı qızışdırmağa, revanş götürüb yenidən münaqişə yaratmaq çalışanlara dəstək verməyə çalışır. Bununla Fransa Afrikada itirdiyi koloniyalarını Ermənistanla əvəzləmək istiqamətində siyasət aparır.
Görünən odur ki, Azərbaycanın Qarabağı azad edərək burada geniş quruculuq işlərinə başlaması və regionda yaşayan erməniləri reinteqrasiya prosesinə cəlb edib, öz vətəndaşı kimi qəbul etməsi Fransanın heç də konstruktiv yanaşmasından xəbər vermir.
Vaxtilə Ermənistan hərbçiləri azərbaycanlıları öz doğma yurd-yuvalarından qovarkən onları dəhşətli işgəncələrə məruz qoymuşlar. Xocalı faciəsi zamanı törədilən cinayətlər bir sıra beynəlxalq təşkilatlar tərəfindən soyqırımı kimi tanınsa da Fransa susdu. İndi Azərbaycana qarşı yalan və heç bir fakta söykənməyən ittihamlar irəli sürməklə Fransa özünü humanist kimi göstərə bilməz. Onun əsl siması Əlcəzairdə, Nigerdə və Afrikanın digər ölkələrində üzə çıxıb”.
Bölmənin digər xəbərləri
