Bakı, 27 oktyabr, AZƏRTAC

Prezident İlham Əliyevin və birinci xanım Mehriban Əliyevanın oktyabrın 25-də Qubadlı rayonuna səfəri zamanı ictimaiyyət nümayəndələri ilə görüşləri geniş əks-səda doğurub. Səfər iştirakçılarından biri - Qubadlı Rayon Təhsil Şöbəsinin müdiri Fuad Bədəlov bununla bağlı təəssüratlarını AZƏRTAC-ın oxucuları ilə bölüşür.

Bu gün respublikamızda bütün sahələrdə dinamik inkişaf təmin edilib, ölkəmiz beynəlxalq təşkilatlar tərəfindən qəbul olunan bir çox parametrlər üzrə dünya dövlətləri arasında öncül yerlərdə qərar tutub. İndi ölkədə həyata keçirilən irimiqyaslı layihələr Azərbaycanın daha uğurlu gələcəyindən xəbər verir. Ötən dövrlərdən Azərbaycan iqtisadi baxımdan sürətli inkişaf tempinə qədəm qoydu. İqtisadiyyatı gücləndikcə ordunun təchizatında əsaslı dəyişikliklər həyata keçirildi. 2020-ci il sentyabrın 27-də başlanan Vətən müharibəsi bizim hərbi gücümüzün sübutu oldu. Biz dünyanın qabaqcıl dövlətlərinin belə örnək göstərdiyi, öyrənməyə çalışdığı bir hərbi fənd, taktika işlətdik. Biz bunu sadəcə güc yolu ilə deyil, eyni zamanda, Müzəffər Ali Baş Komandan İlham Əliyevin siyasi liderlik qabiliyyəti sayəsində əldə etdik. Prezident İlham Əliyev XXI əsrin ən yüksək texnoloji silahlarına malik ordu qurmağa nail oldu. Bu rəşadətli Ordu sayəsində 44 gün ərzində torpaqlarımız düşmən işğalından azad edildi.

Oktyabrın 25-də biz doğma torpağımızda Müzəffər Ali Baş Komandan, Prezident İlham Əliyev və birinci xanım Mehriban Əliyeva ilə görüşə, rayonumuzun azad edilməsinin birinci ildönümünü qeyd etməyə gəlmişdik. Bu gün mənim yaddaşımda ən önəmli tarix kimi qalacaq. Ötən 27 il ərzində biz Qubadlılı günlərimizi, elimizi, obamızı, doğma yurdumuzu xəyallarımızda yaşatdıq, canlandırdıq. 2021-ci il oktyabrın 25-i isə xəyallarımızın reallaşdığı gün idi. Prezidentimiz bizi uşaqkən ayrılmaq məcburiyyətində qaldığımız yurdumuza, elimizə-obamıza qovuşdurdu. İllər ərzində bu, bir çoxları üçün əlçatmaz görünürdü. Müzəffər Ali Baş Komandan bu əlçatmazlığı bütün Azərbaycan xalqı üçün, ürəyi bu torpaqla döyünən hər kəs üçün reallaşdırdı.

Qubadlının azad edilməsi Vətən müharibəsinin taleyini həll edən ən əsas amillərdən biri oldu. Belə ki, Qubadlıdan sonra Azərbaycan Ordusu Laçının cənub hissəsində yerləşən kəndləri də azad etdi. Bununla da Gorus-Şuşa-Kəlbəcər-Qubadlı arasında yerləşən, strateji baxımdan çox əhəmiyyətli olan, təbii resurslarla zəngin, Qarabağla Zəngəzur arasında möhtəşəm bir körpü rolunu oynayan Laçın dəhlizi nəzarətə götürüldü və Şuşa azad olundu. Respublikamızın ərazi bütövlüyü bərpa ediləndən sonra erməni vandalları tərəfindən işğal dövründə viran edilmiş, xarabalığa çevrilmiş ərazilərin yenidən yaşayış üçün lazımi vəziyyətə gətirilməsi üçün göstərişlər verildi. Azad olunmuş ərazilərin abadlaşdırılması və tikilməsi Prezidentin nəzarəti altındadır. Prezident İlham Əliyevin oktyabrın 25-də imzaladığı “Şərqi Zəngəzur iqtisadi rayonunda yerləşən Qubadlı şəhərinin Baş planının hazırlanması ilə bağlı tədbirlər haqqında” Sərəncamda da Qubadlının təbiəti, tarixi keçmişinin nəzərə alınması dövlət başçısı tərəfindən xüsusi diqqətdə saxlanılıb.

Onu da qeyd edim ki, özlərini dırnaqarası “qədim xalq”, “mədəniyyət beşiyi” adlandıran ermənilər 30 il ərzində heç bir tikinti işləri aparmayıb, əksinə bütün tikililəri, mədəniyyət abidələrini məhv ediblər. 44 günlük Vətən müharibəsində şanlı Qələbə qazandıqdan sonra dövlətimiz tərəfindən həmin yerlərdə əsaslı yenidənqurma və bərpa işlərinə başlanılıb. Qubadlı rayonunda Dövlət Sərhəd Xidmətinin yeni hərbi hissə kompleksinin, “Qubadlı” yarımstansiyasının, Füzuli Beynəlxalq Hava Limanının açılması bizi sevindirir, qürurlandırır. Prezidentin rəhbərliyi ilə biz də bundan sonra bu torpaqların yenidən canlandırılması, işğaldan əvvəlki kimi o xoş günlərinə qayıtması üçün var qüvvəmizlə çalışacağıq.