Füzuli rayonu ərazisindəki kurqanda beynəlxalq arxeoloji ekspedisiya fəaliyyət göstərir
Bakı, 18 noyabr, AZƏRTAC
Azərbaycan Milli Elmlər Akademiyasının (AMEA) İctimai Elmlər Bölməsinin Elmi şurasının növbəti iclası keçirilib.
Akademiyadan AZƏRTAC-a bildirilib ki, iclası AMEA-nın vitse-prezidenti vəzifəsini icra edən, İctimai Elmlər Bölməsinin Elmi şurasının sədri akademik Gövhər Baxşəliyeva açaraq gündəlikdə qoyulan məsələlər barədə məlumat verib.
Akademik Gövhər Baxşəliyeva Vətən müharibəsindəki tarixi Qələbədən sonra Prezident İlham Əliyevin rəhbərliyi altında Qarabağda geniş quruculuq işlərinin həyata keçirildiyini söyləyib və Azərbaycan alimlərinin də Böyük Qayıdışa öz töhfələrini verdiklərini bildirib.
AMEA-nın Arxeologiya, Etnoqrafiya və Antropologiya İnstitutunun baş direktoru tarix elmləri doktoru Abbas Seyidov işğaldan azad olunmuş torpaqlarda - Əhmədbəyli-Füzuli-Şuşa magistral avtomobil yolunun 31-ci km-də yerləşən kurqan tipli qəbir abidədə aparılan arxeoloji qazıntı işlərinin vəziyyəti haqqında məlumat verib. O, ölkə Prezidentinin göstərişinə əsasən, Əhmədbəyli-Füzuli-Şuşa magistral avtomobil yolunun 31-ci km-də yerləşən (Füzuli rayonunun işğaldan azad olunmuş ərazisi) kurqan çölündə 1-2-3 saylı kurqanlarda institutun əməkdaşları - tarix elmləri doktoru, professor Arif Məmmədov və tarix üzrə fəlsəfə doktoru, dosent Zaur Həsənovun rəhbərliyi ilə arxeoloji qazıntı işlərinin aparıldığını vurğulayıb. Alimin sözlərinə görə, 1 və 2 saylı kurqanlar bilmədən, təsadüfən dağıdılıb, 3 saylı kurqan isə salamat qaldığı üçün ölkə Prezidentinin tapşırığı ilə həmin ərazidə yol çəkilişi dayandırılıb və hazırda kurqanda beynəlxalq arxeoloji ekspedisiya fəaliyyət göstərir.
İclasda, həmçinin AMEA-nın İctimai Elmlər Bölməsi üzrə elmi-tədqiqat müəssisələrinin 2023/2024-cü tədris ili üçün magistraturaya qəbul planına dair təkliflər müzakirə edilib. Daha sonra AMEA-nın Arxeologiya, Etnoqrafiya və Antropologiya İnstitutunun, o cümlədən İqtisadiyyat İnstitutunun Elmi şurasının tərki¬bin¬də qismən dəyişiklik edilib və bir sıra kadr məsələlərinə baxılıb. Bundan əlavə, akademik Cəmil Quliyevin 95, AMEA-nın müxbir üzvü Arif Abbasovun isə 85 illik yubileyləri ilə əlaqədar AMEA-nın Rəyasət Heyəti qarşısında vəsatət qaldırılıb.
Sonda İctimai Elmlər Bölməsinin elmi-tədqiqat müəssisələrinin gələcək fəaliyyəti və qarşıda duran vəzifələrə dair, eləcə də hesabatların hazırlanması ilə bağlı müəyyən tapşırıqlar verilib.
Bölmənin digər xəbərləri
