Gənc azərbaycanlı pianoçu Avstriyada Qran-priyə layiq görülüb
Bakı, 3 noyabr, AZƏRTAC
Avstriyanın Zalzburq şəhərində ikinci dəfə “Zalzburq star” adlı beynəlxalq musiqi müsabiqə-festivalı keçirilib. Bu müsabiqədə ölkəmizi T.Quliyev adına 12 nömrəli onbirillik uşaq musiqi məktəbinin VI sinif şagirdi, Q.Qarayev adına Dövlət kamera orkestrinin direktoru Nazilə Yaqubovanın sinfində təhsil alan Ayan Məmmədli təmsil edib.
AZƏRTAC xəbər verir ki, A.Məmmədli dahi bəstəkar V.A.Motsartın doğulduğu Zalzburq şəhərində keçirilən müsabiqədə Azərbaycan bəstəkarı Q.Qarayevin prelüdi ilə yanaşı, məşhur Avstriya bəstəkarları K.Çerni - F.Şubertin variasiyasını, həmçinin hazırda məşhur müasir bəstəkar N.Kapustinin prelyüdiyasını ifa edib. Dünyanın bir çox tanınmış pianoçularının ifa etdiyi N.Kapustinin bu əsəri respublikamızda ilk dəfə 13 yaşlı Ayan Məmmədli tərəfindən səsləndirilib.
Müsabiqədə A.Məmmədlinin möhtəşəm ifası dünyanın tanınmış musiqiçilərdən ibarət münsiflər heyəti, həmçinin də bütün iştirakçı və tamaşaçılar tərəfindən böyük heyrət və rəğbətlə qarşılanıb. Nəticədə azərbaycanlı gənc pianoçu Ayan Məmmədli “Zalzburq star” müsabiqəsinin ən ali mükafatına, Qran-priyə layiq görülüb.
Qeyd edək ki, bu, Ayan Məmmədlinin ilk qələbəsi deyil. O, müxtəlif illərdə keçirilmiş bir sıra beynəlxalq müsabiqələrdə iştirak edərək laureat adını qazanıb.
Bölmənin digər xəbərləri
