Gənc ədliyyə könüllüləri ilə görüş
Bakı, 6 may, AZƏRTAC
Müasir Azərbaycan gəncliyinin hərtərəfli inkişafı ümummilli lider Heydər Əliyevin adı ilə bağlıdır. Dahi öndərin bu sahədə təməlini qoyduğu dövlət siyasəti ölkəmizdə gənclərin cəmiyyətin bütün sahələrində, o cümlədən dövlət idarəçiliyində fəal iştirakına əlverişli şərait yaradıb. Dövlət gənclər siyasətinin Azərbaycan Prezidenti İlham Əliyevin rəhbərliyi ilə uğurla həyata keçirilməsi nəticəsində ictimai-siyasi həyatda gənclərin fəallığı, təşəbbüskarlığı, irimiqyaslı layihələrin icrasında və idarəetmədə rolu artıb, vətənpərvərlik ruhu və vətəndaşlıq mövqeyi möhkəmlənib, könüllülük hərəkatı genişlənib. İstedadlı gənclərin dəstəklənməsi, onların innovativ potensiallarının və bacarıqlarının üzə çıxarılması istiqamətində Azərbaycanın Birinci vitse-prezidenti Mehriban xanım Əliyevanın mühüm fəaliyyəti xüsusi qeyd olunmalıdır. Cəmiyyətin fəal üzvünə çevrilən gənclər bu gün həm də könüllülük hərəkatının aparıcı qüvvəsi olmaqla səmərəli fəaliyyətləri ilə fərqlənirlər.
Xalqımızın ümummilli lideri Heydər Əliyevin anadan olmasının 96-cı ildönümü ərəfəsində ədliyyə sahəsində könüllü fəaliyyətə cəlb edilən gənclərin növbəti böyük bir qrupu ilə Ədliyyə Nazirliyində görüş keçirilib.
Ədliyyə Nazirliyinin mətbuat xidmətindən AZƏRTAC-a bildiriblər ki, tədbirdən öncə könüllülər ümummilli lider Heydər Əliyevin nazirliyin binasındakı büstü önünə əklil qoyub, əziz xatirəsini ehtiramla yad edib, Ulu Öndərin adını daşıyan muzeydə zəngin və maraqlı ekspozisiyalarla tanış olublar.
Görüşdə çıxış edən ədliyyə nazirinin müavini Toğrul Musayev Azərbaycanın bugünkü uğurlu inkişafının təməlində dayanan, xalqın və dövlətin gələcəyinə işıq salan Heydər Əliyev dühasından, zəngin irsindən bəhs edib, Prezident İlham Əliyevin rəhbərliyi ilə dövlət gənclər siyasəti sahəsində həyata keçirilən çoxşaxəli tədbirlərdən danışıb.
Ədliyyə orqanlarında könüllülərin fəaliyyətə geniş təşviq edildiyini bildirən nazir müavini dövlətimizin başçısının cari ilin fevralında gənclərlə keçirdiyi respublika toplantısında verdiyi tapşırıqlara və çağırışlara uyğun olaraq görülən işlər barədə məlumat verib. T.Musayev gənclərin ədliyyə sahəsində könüllü fəaliyyəti üçün elektron qaydada birbaşa müraciət etmək imkanlarının yaradıldığını, müvafiq ali təhsil müəssisələri və tələbə-gənclər təşkilatları, eləcə də Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə səmərəli əlaqələrin genişləndirildiyini bildirib.
Hazırda 600-dən çox ədliyyə könüllüsü nazirliyin aparatında, icra və probasiya xidmətlərində, qeydiyyat və notariat orqanlarında, Ədliyyə Akademiyasında və regional ədliyyə idarələrində, habelə “ASAN School” proqramı çərçivəsində müvafiq məhkəmə aparatlarında fəaliyyətə cəlb olunub.
Nazir müavini gənclərə zəruri təcrübə toplamaları, milli və vətənpərvərlik ruhunda tərbiyə almaları, xalqa və dövlətə bağlılığı, müstəqilliyimizin möhkəmləndirilməsi, ədliyyə idarəçiliyində şəffaflığın və vətəndaş məmnunluğunun artırılmasında, ictimai nəzarətin həyata keçirilməsində fəal iştirak etmələri barədə tövsiyələr verib.
Tədbirdə iştirak edən “ASAN Könüllüləri” Təşkilatının sədri Səbinə Cabbarova son illər Azərbaycanda könüllülər hərəkatının geniş vüsət aldığını, minlərlə gəncin müxtəlif təşkilatlarda, o cümlədən “ASAN Könüllülər” şəbəkəsində fəaliyyətə cəlb edildiyini bildirib, bu sahədə Ədliyyə Nazirliyi ilə səmərəli əməkdaşlığı qeyd edib.
Ədliyyə naziri yanında İctimai Komitənin üzvü Şahin Camalov ədliyyə fəaliyyətində, o cümlədən qulluğa qəbul prosesində hər zaman şəffaflığa, ictimai iştirakçılığa böyük önəm verildiyini, gənclərə gələcək karyeralarını qurmaları işinə xüsusi qayğı ilə yanaşıldığını vurğulayıb.
Eyni zamanda, ədliyyə könüllülərinin fəaliyyət göstərdikləri sahələr üzrə təşəbbüsləri, innovativ ideyaları və təklifləri dinlənilib, gənclərin uğurla fəaliyyət göstərəcəklərinə, müstəqil Azərbaycanımızın hərtərəfli inkişafı üçün sədaqətlə və əzmkarlıqla çalışacaqlarına əminlik ifadə olunub.
Sonda ədliyyə könüllülərinə xüsusi hazırlanmış suvenirlər, həmçinin vəsiqə və nişan təqdim olunub, xatirə şəkli çəkdirilib.
Bölmənin digər xəbərləri
