GƏNCƏ BEYNƏLXALQ HAVA LİMANI İLK DƏFƏ OLARAQ AĞIR YÜK TƏYYARƏSİ QƏBUL ETMİŞDIR
AZƏRTAC xəbər verir ki, aprelin 6-da yenidən qurulmuş Gəncə beynəlxalq hava limanı ilk dəfə olaraq ağır yük təyyarəsi qəbul etmişdir.Luksemburqun “Cargolux” şirkətinə məxsus olan və Honkonq-Budapeşt reysi ilə hərəkət edən “Boinq-747” tipli təyyarənin ağırlığı 400 tondur.
“Azərbaycan Hava Yolları” Dövlət Konserninin baş direktorunun müavini Etibar Hüseynov bildirmişdir ki, eniş uğurlu keçmişdir. Hava limanının 3300 metr olan uçuş-enmə zolağı, dünya standartlarına cavab verən müasir texniki vasitələr bu cür təyyarələrin qəbul edilməsinə imkan verir.
Gəncə Şəhər İcra Hakimiyyətinin başçısı Eldar Əzizov Prezident İlham Əliyevin Sərəncamı ilə yenidən qurulmuş hava limanının bu tip təyyarələrin qəbul etməsinin əhəmiyyətini vurğulayaraq, şəhərin hava nəqliyyatının tarixində yeni mərhələnin başlandığını demişdir.Təyyarənin göyərtəsində olan “Cargolux” şirkətinin Azərbaycandakı nümayəndəsi Bülənt İlhan sınaq enməsi zamanı heç bir problemin olmadığını və hava limanındakı elektron naviqasiya vasitələrinin təyyarədəki avadanlıqlarla tam uyğun rejimdə işlədiyini diqqətə çatdırmışdır.
Gəncə Beynəlxalq hava limanında yanacaq götürən “Boinq-747” təyyarəsi yenidən səmaya qalxaraq marşrutu üzrə uçuşu davam etdirmişdir.
Bölmənin digər xəbərləri
