Gəncədə Müstəqilliyin Bərpası Gününə həsr olunan regional konfrans keçirilib
Gəncə, 17 oktyabr, Elcan Məmmədov, AZƏRTAC
Azərbaycan Ağsaqqallar Şurası Gəncədə “Konstitusiya və Suverenlik İli” çərçivəsində Müstəqilliyin Bərpası Gününə həsr olunan “Azərbaycanın müstəqillik salnaməsi: Suverenliyə aparan yol” mövzusunda regional konfrans keçirib.
AZƏRTAC-ın bölgə müxbiri xəbər verir ki, Azərbaycan Dövlət Aqrar Universitetində keçirilən regional konfransda Dövlət Himni səsləndirildikdən sonra Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib.
Konfransda çıxış edən universitetin rektoru Zəfər Qurbanov Prezident İlham Əliyev tərəfindən 2025-ci ilin “Konstitusiya və Suverenlik İli” elan edilməsi bağlı fikirlərini bölüşüb, 18 Oktyabr - Müstəqilliyin Bərpası Gününü tariximizin böyük dönüş nöqtəsi kimi dəyərləndirib. O, Müzəffər Ali Baş Komandan İlham Əliyevin rəhbərliyi ilə torpaqlarımızın işğaldan azad edilməsi və suverenliyimizin tam bərpa olunması uğrunda misilsiz qəhrəmanlıqlar göstərmiş Vətən övladlarından söz açıb. Bütün şəhidlərimizi, eləcə də Azərbaycan Dövlət Aqrar Universitetinin məzunu olmuş 30-dan çox şəhidi ehtiramla xatırlayıb. Ölkəmizdə ağsaqqallarla gənclərin vəhdətini yüksək dəyərləndirən Zəfər Qurbanov bu birliyin növbəti təzahürü olan regional konfransın işinə uğurlar arzulayıb.
Sonra Azərbaycan Ağsaqqallar Şurasının sədr müavini, təşkilatın Qərb regionu üzrə kuratoru Bayram Yusifov hər kəsi qarşıdan gələn Müstəqilliyin Bərpası Günü münasibətilə təbrik edib. “Biz bu müstəqilliyi Ümummilli Lider Heydər Əliyevin sayəsində qoruyub saxlaya bildik. Ulu Öndər dövlətimizi məhv olmaqdan xilas etdi və bu gün Heydər Əliyevin layiqli davamçısı, Prezident İlham Əliyevin qətiyyətli və uzaqgörən siyasəti nəticəsində müstəqil və suveren Azərbaycan dünya səviyyəsində güclü və qüdrətli ölkəyə çevrilib”, - deyə o vurğulayıb.
Türkiyənin Gəncə şəhərindəki baş konsulunun müavini Yiğit Yalın Soyal, Gəncə Şəhər İcra Hakimiyyətinin nümayəndəsi və digər çıxış edənlər bu tarixi məkanda – Azərbaycan Xalq Cümhuriyyətinin Gəncədə fəaliyyət göstərdiyi binada Müstəqilliyin Bərpası Gününə həsr olunmuş regional konfransın keçirilməsinin böyük əhəmiyyətə malik olduğunu vurğulayıblar. Çıxışlarda Ulu Öndər Heydər Əliyevin 1993-cü ildə Azərbaycanda hakimiyyətə qayıdışından sonra dövlət müstəqilliyimizin qorunub saxlanması uğrunda apardığı qətiyyətli mübarizədən, eləcə də ölkə başçısı İlham Əliyevin bu sahədəki uğurlu siyasətindən ətraflı bəhs olunub.
Tədbirdə Gəncə Şəhər Ağsaqqallar Şurasının sədri 88 yaşlı professor Nurəddin Məmmədov uzunmüddətli səmərəli fəaliyyətinə və xidmətlərinə görə Azərbaycan Ağsaqqallar Şurasının “Fəxri Ağsaqqal” döş nişanı ilə təltif olunub.
Sonra konfrans iştirakçıları Gəncə Memorial Kompleksini ziyarət ediblər. Kompleksdə şəhidlərin xatirəsinə ehtiram əlaməti olaraq abidənin önünə gül dəstələri qoyulub, Gəncə terroru zamanı həlak olanların ruhuna dualar oxunub.
Bölmənin digər xəbərləri
