GƏNCƏDƏ TOP FESTİVALI
AZƏRTAC-ın müxbiri xəbər verir ki, aprelin 12-də Gəncədəki Heydər Əliyev adına mərkəzi meydanda Azərbaycan Futbol Federasiyaları Assosiasiyası (AFFA) ilə Gəncə Şəhər İcra Hakimiyyəti birgə “Top festivalı” keçirmişlər.
“Hyundai Auto Azerbaijan” şirkətinin maliyyə dəstəyi ilə keçirilən tədbirdə AFFA-nın baş katibi Elxan Məmmədov son illər Azərbaycanda idmanın kütləviliyinin artırılmasına göstərilən dövlət qayğısından danışmış, eləcə də bu festivalın respublika Prezidenti İlham Əliyevin 2005-2015-ci illərdə Azərbaycanda futbolun inkişafı ilə bağlı imzaladığı müvafiq sərəncama uyğun olaraq həyata keçirildiyini diqqətə çatdırmışdır. O bildirmişdir ki, bu festival keçən ilin dekabr ayında Bakıda keçirildikdən sonra onun uğurlu nəticələri nəzərə alınaraq regionlarda keçirilməsi qərara alınmışdır.
AFFA-nın vitse-prezidenti, Milli Məclisin deputatı Rauf Əliyev və Gəncə Şəhər İcra Hakimiyyəti başçısının müavini Akif Ələkbərov festival iştirakçılarını salamlayaraq onlara uğurlar arzuladıqdan sonra yarışlara start verilmişdir. 250 nəfərədək yeniyetmə 10 nəfərlik qruplara bölünərək top çiləməklə bacarıqlarını nümayiş etdirmişlər.
3 turda keçirilən festivalın yekun turuna düşən uşaqlar daha gərgin mübarizə aparmışlar.
1, 2 və 3-cü yerləri tutan qaliblərə münsiflər heyətinin qərarı ilə AFFA-nın qiymətli hədiyyələri verilmişdir.
Bölmənin digər xəbərləri
