Əziz idmançılar, hörmətli qonaqlar!

Müstəqil Azərbaycanın tarixində artıq üçüncü dəfədir ki, bu gün toplaşdığımız “Gənclik” Beynəlxalq turizm mərkəzində Azərbaycan idmançılarının yolasalma mərasimi keçirilir. Ümummilli liderimiz Heydər Əliyev müstəqil Azərbaycan idmanının bütün nailiyyət və uğurlarının səbəbkarı olduğu kimi, bu gözəl ənənənin də təşəbbüskarı və yaradıcısı olmuşdur. Məhz Heydər Əliyevin xeyir-duası ilə idmançılarımız 1996-cı ildə Atlantaya, 2000-ci ildə isə Sidney Olimpiya oyunlarına yola düşmüş, onun dəyərli tövsiyələri idmançılarımızda ruh yüksəkliyi və nikbin əhval-ruhiyyə yaratmışdır.

Bu gün də sanki ümummilli liderimizin ruhu bizimlə bərabərdir. Çünki onun adı hər bir vicdanlı Azərbaycan vətəndaşı kimi, hər bir idmançının da qəlbinə əbədi həkk olmuşdur. XXVIII Yay Olimpiya oyunlarında iştirak edəcək Azərbaycan milli yığma komandasının üzvləri və ölkəmizin idman ictimaiyyətinin nümayəndələri bu mərasimdən əvvəl Fəxri xiyabanı ziyarət etmiş, ulu öndərimizin məzarı üzərinə əklillər, gül-çiçək dəstələri qoymuşlar.

İcazə verin, Heydər Əliyevin əziz xatirəsini bir dəqiqəlik sükutla yad edək.

Allah rəhmət eləsin!

Hörmətli mərasim iştirakçıları!

Bütün dünya xalqları planetimizin ən möhtəşəm yarışlarının – XXI əsrin Olimpiya oyunlarının astanasında dayanmışdır. Səbirsizliklə gözlədiyimiz XXVIII Yay Olimpiya oyunları günbəgün yaxınlaşmaqdadır. Olimpiya oyunları ümumbəşəri dəyərlərə bağlılıq, milli maraqların qorunması, milli özünütəsdiq, sülh deməkdir. Olimpiya Oyunları dünya xalqlarının və ölkələrinin bir-birinə tanıdılması, təbliğ olunması baxımından əvəzsiz rol oynayır. Olimpiya oyunlarında iştirak etmək və nailiyyət qazanmaq hər bir dövlətin beynəlxalq nüfuzunun yüksəlməsinə təsir göstərən amillərdən biri hesab olunur.

Ölkəmizin Olimpiya yığma komandası bu yarışlarda 38 idmançı ilə təmsil ediləcəkdir. Onlar bu hüquqa gərgin iş, inadlı zəhmət sayəsində nail olmuşlar. Qarşıda isə olimpiyaçılarımızın ən önəmli vəzifəsi oyunlarda yeni uğurlar qazanmaq, Azərbaycanın idman şərəfini ləyaqətlə qorumaqdır. Bu məqsədi reallaşdırmaq üçün dövlətimiz, ölkəmizin bütün idman təşkilatları dörd il öncə böyük və məsuliyyətli işə hazırlığa başlamışdır. Hazırlıq prosesi isə bütövlükdə ümummilli liderimiz Heydər Əliyevin “XXVIII Yay Olimpiya Oyunlarına hazırlıq haqqında” 2003-cü il 5 iyun tarixli Sərəncamının həyata keçirilməsindən ibarət idi.

Sidney Olimpiya oyunlarına hazırlıq ərəfəsində sınaqdan çıxmış təcrübəyə istinad edərək və Afina Olimpiadasına hazırlığı mütəşəkkil, planlı və elmi əsaslar üzərində aparmaq məqsədi ilə Milli Olimpiya Komitəsi nazirliklə birlikdə hazırlıq konsepsiyası tərtib etmişdir.

İlk baxışdan çox sadə və yığcam görünən bu sənəd, əslində, respublikamızın bütün idman təşkilatlarının həm elmi-texniki, həm kadr potensialını, həm də ehtiyat qüvvələrini araşdırmağa imkan verən çoxşaxəli proqram kimi nəzəri cəlb etmişdir.

Ölkə idmançılarının Olimpiadaya hazırlığı mərhələlər üzrə aparılmışdır. 2001-ci ili əhatə edən birinci mərhələdə Sidney Olimpiya oyunlarında qazanılmış nəticələr dərindən təhlil edilmiş, daha yüksək nəticələr gözlənilən idman növləri müəyyənləşdirilmiş, məşq və yarış zamanı idmançıların fəaliyyətləri müasir parametrlərə uyğun formalaşdırılmış və idman ustalığının təkmilləşdirilməsi prosesi həyata keçirilmişdir.

İkinci mərhələdə hazırlığın daha səmərəli təşkili məqsədi ilə dayaq idman növləri və müvafiq növlər üzrə dayaq idman bazaları müəyyənləşdirilmiş, bu idman növlərini inkişaf etdirən federasiyalardan namizəd idmançılar haqqında təkliflər alınmış, lisenziya əldə edə biləcək idmançıların və ehtiyat qüvvənin tam tərkibi hazırlanmışdır. Eləcə də bu dövrdə hazırlığın səviyyəsini əks etdirən model göstəricilər və normativlər sistemi hazırlanmış, yüksək dərəcəli idmançıların hazırlanması üçün elmi qruplarla birlikdə elmi-metodiki əsaslar işlənmiş, idman nailiyyətlərinin proqnozlaşdırılması, idmançıların sosial-məişət problemləri öz həllini tapmışdır.

XXVIII Yay Olimpiya oyunlarına vəsiqə verən əsas beynəlxalq yarışların əksəriyyəti 2003-2004-cü illərə təsadüf etmişdir. Hazırlığın ən gərgin və məsuliyyətli olan üçüncü mərhələsi də bu illəri əhatə etmişdir. Bu mərhələdə federasiyaların tərtib etdikləri planlara nazirlikdə, Milli Olimpiya Komitəsində və məşqçilər şurasında baxılaraq, yığma komandaların hazırlığı ilə əlaqədar təlim-məşq prosesində iştirak edəcək idmançılar müəyyən edilmiş, idman növlərinin hazırlığını müəyyən edən konkret tədbirlər planı tərtib olunmuşdur.

Olimpiya oyunlarına sırf hazırlıqla bağlı görülən işlərlə paralel olaraq, respublikamızda oyunlara istiqamətləndirilmiş kütləvi tədbirlər təşkil edilmiş, demək olar ki, bütün bölgələrin yeniyetmə və gəncləri tədbirlərə cəlb edilmişlər.

Ölkəmizdə olimpiya hərəkatının daha da genişlənməsi, idmançılarımızın beynəlxalq yarışlarda əldə etdikləri nəticələr beynəlxalq qurumların diqqətini Azərbaycana yönəltmiş, bunun nəticəsində son illərdə Bakıda bir sıra nüfuzlu beynəlxalq yarışlar, o cümlədən Afina Olimpiadasına vəsiqə verən təsnifat turnirləri yüksək səviyyədə təşkil edilmişdir. Bu yarışlar həm idmançılarımızın peşəkarlıq səviyyəsinin artmasında, həm də ölkəmizin bir idman dövləti olaraq dünyada tanınmasında əhəmiyyətli rol oynamışdır.

Azərbaycan idmançıları Milli Olimpiya Komitəsi, nazirlik və federasiyalar tərəfindən mütəmadi olaraq dünya və Avropa çempionatlarına göndərilmiş, bu yarışlardan Vətənə sanballı nəticələrlə dönmüşlər. Ölkəmizə gətirilən medalların kəmiyyət baxımından ildən-ilə artımı bunu bir daha sübut etmişdir. Əgər 1992-ci ildə rəsmi beynəlxalq yarışlarda Azərbaycan idmançıları tərəfindən cəmi 23 medal qazanılmışdısa, 2003-cü ilin yekunlarına görə medalların sayı 188-ə çatmışdır.

Möhtərəm Prezident!

Sizin daim idmana göstərdiyiniz diqqət və qayğınız sayəsində idmanımızın beynəlxalq miqyasda təsdiqlənməsi, yarış və məşq proseslərinə ciddi nəzarətiniz, hər rəsmi yarışdan sonra nailiyyət qazanmış adlı-sanlı idmançıları qəbul edib, onları həvəsləndirməyiniz idmançılarda, onların hazırlanmasında zəhmətləri olan məşqçilərdə ruh yüksəkliyi yaratmış, gələcəyə daha nikbin gözlə baxmağa həvəsləndirmişdir. Belə qayğı və diqqətə görə Sizə bütün idmançılar adından səmimi təşəkkürümü bildirirəm.

Hesab edirəm ki, ölkəmizdə idmanın maddi-texniki bazasının möhkəmləndirilməsi üçün görülən işlərdən saatlarla danışmaq olar. Hörmətli Prezidentimiz cənab İlham Əliyevin rəhbərliyi altında Milli Olimpiya Komitəsi tərəfindən Olimpiya oyunlarına hazırlıq prosesi çərçivəsində ölkədə tikilib istifadəyə verilən yeni idman qurğuları idman nəticələrimizin ildən-ilə artmasına, idmanın kütləvi inkişafına, Olimpiadaya hazırlıq işinin sürətləndirilməsinə şərait yaratmışdır. Elə bunun nəticəsidir ki, indi olimpiya yığma komandamızın tərkibində ölkəmizi, ötən Olimpiya oyunlarından fərqli olaraq, 5 şəhərin – Bakı, Sumqayıt, Gəncə, Lənkəran və Mingəçevirin idmançıları təmsil edəcəklər.

Biz çalışmışıq ki, hazırlığın mütəşəkkil aparılması naminə hər bir xırda məsələyə həssaslıqla yanaşaq, ortaya çıxan problemləri vaxtında həll edək. Demək olar ki, ehtiyac duyulan idman bazaları yeni inventarlar, idman ləvazimatı ilə təmin edilmiş, yığma komandalara hazırlıq prosesi üçün zəruri olan dərman preparatları və vitaminlər verilmişdir. Respublika idmançılarının Olimpiadaya hazırlıq işləri ilə gündəlik və kooperativ şəkildə məşğul olmaq və nəzərdə tutulmuş tədbirlərin vaxtlı-vaxtında həyata keçirilməsini təmin etmək məqsədi ilə xüsusi qərargah yaradılmışdır.

Qərargah idman təşkilatları və idman növləri üzrə federasiyalarla birlikdə milli komandaların heyətlərini hazırlamış, hazırlığa cəlb edilmiş bütün namizədlərin fərdi planlarını nəzarətə götürmüş, lazım olan maliyyə vəsaitinin smeta xərclərini tərtib etmiş, idmançıların və məşqçilərin maddi-texniki təminatını, həkim nəzarəti və tibbi xidmət işlərinin ciddi nəzarətə götürülməsini təmin etmişdir.

XXVIII Yay Olimpiya oyunlarına respublika rəhbərliyi tərəfindən ilk dəfə olaraq, dövlət büdcəsinə daxil edilən “Olimpiya oyunlarına hazırlıqla bağlı xərclər” bölməsindən 3 milyard 500 milyon manat məqsədli vəsait ayrılmışdır. Olimpiya oyunlarına hazırlıq üçün sərf olunmuş vəsaitin ümumi xərci 4 milyard 105 milyon manat təşkil etmişdir. O cümlədən lisenziya turnirlərində iştirak və lisenziya turnirlərinin respublikamızda keçirilməsi üçün 1 milyard 540 milyon manat, təlim-məşq toplanışlarının keçirilməsi üçün 500 milyon manat, idman forması, idman inventarı və avadanlığı, idmançılar üçün dərman preparatları və vitaminlər, sarğı materialları alınması üçün 1 milyard 385 milyon manat, Olimpiya oyunlarına lisenziya qazanmış idmançılara və onların məşqçilərinə xüsusi Olimpiya təqaüdünün verilməsi üçün 160 milyon manat, idman nümayəndə heyətinin Olimpiya oyunlarına yola salınması və sair xərclərin ödənilməsi üçün 520 milyon manat vəsait ayrılmışdır. Qeyd etməliyəm ki, bu rəqəmlər yalnız dövlət büdcəsindən ayrılmış vəsaiti əhatə edir. Bundan əlavə, Milli Olimpiya Komitəsi və müvafiq federasiyalar tərəfindən hazırlıq prosesinin mütəşəkkil aparılması üçün lazımi kömək göstərilmişdir. Fürsətdən istifadə edərək, göstərdikləri səmərəli fəaliyyətlərinə görə müvafiq idman təşkilatlarına Gənclər, İdman və Turizm Nazirliyi adından təşəkkürümü bildirirəm.

Azərbaycan idmançıları da onlara yaradılan belə əlverişli şəraitdən məharətlə istifadə edərək, Olimpiya oyunlarına 38 lisenziya əldə etmişlər.

Bir faktı da xüsusi vurğulamaq lazımdır. Bu da ondan ibarətdir ki, Sidney və Afina Olimpiya oyunlarına vəsiqə əldə etmək şərtləri heç də eyni olmamışdır. Sonuncuda bu şərtlər xeyli çətinləşdirilmişdir. Xüsusilə də dopinqə qarşı mübarizə çərçivəsində dünyada keçirilən bütün rəsmi yarışların ciddi nəzarətə götürülməsini xatırlasaq, lisenziya qazanmağın nə qədər çətin olduğunun bir daha şahidi oluruq. Lakin idmançılarımız bütün bu maneələri dəf edib olimpiadada iştirak hüququ əldə edə bilmişlər.

Eyni zamanda, bizi sevindirən olimpiya lisenziyalarının təkcə kəmiyyət baxımından artması deyil, həm də keyfiyyət cəhətdən də irəli getməyimizdir. Əgər Sidneydə yığma komandamız 10 idman növündə təmsil olunmuşdusa, Afinada 12 idman növü üzrə yarışacaqdır. Bu idman növlərini diqqətinizə çatdırmaq istərdim: boks, ağır atletika, taekvondo, cüdo, sərbəst güləş, yunan-Roma güləşi, bədii gimnastika, stend atıcılığı, güllə atıcılığı, yüngül atletika, üzgüçülük, qılıncoynatma. Taekvondoçularımız, bədii gimnastımız və qılıncoynadan qadın idmançımız da öz adlarının Olimpiya oyunlarının tarixinə düşməsinə nail olmuşlar. Əldə edilən 38 lisenziyadan 36-sı idmançılarımızın çətin yarışlarda gərgin mübarizələri nəticəsində qazanılmış, yalnız iki vəsiqə xüsusi dəvət şəklində təqdim edilmişdir. Belə göstərici isə bir Olimpiadadan digər Olimpiadaya doğru uğurlarını artıran idmançılarımızın, ümumiyyətlə, idmanımızın güclü potensiala malik olmasından xəbər verir.

Olimpiyaçı adına layiq görülmüş hər bir idmançı və onun şəxsi məşqçisi bugünədək həm Milli Olimpiya Komitəsi, həm də nazirlik tərəfindən təqaüdlərlə təmin olunmuşlar.

Bütün hazırlıq işləri geridə qalmışdır. Digər təşkilati məsələlər – akkreditasiya, nəqliyyat, tibbi ləvazimat, idman geyimləri və xüsusi geyimlər kimi məsələlər artıq həll edilmişdir. Missiyamız artıq 10 gündür ki, Afinanın olimpiya şəhərciyində fəaliyyətdədir. Komandamızın əsas tərkibi “Azərbaycan Hava Yolları”nın xüsusi təyyarəsi ilə ayın 10-da birbaşa Afinaya gedəcəkdir. Digər nümayəndələr ayın 12-i və 21-də “İmair”in xüsusi turist uçuşları ilə yarışlara çatdırılacaqlar.

Əlavə olaraq bildirməliyəm ki, avqustun 15-də keçiriləcək “Azərbaycan günü” adlı tədbirin hazırlıq işləri artıq başa çatmaqdadır. Milli Olimpiya Komitəsi tərəfindən hazırlanan bu tədbirdə Beynəlxalq Olimpiya Komitəsinin, bir çox milli olimpiya komitələrinin və beynəlxalq federasiyaların nümayəndələrinin iştirakı gözlənilir.

Qarşıda idmançılarımıza Olimpiya oyunlarında iştirak edərək iradə, dözüm, mərdlik və milli qürur hissi göstərib qələbə uğrunda mübarizə aparmaq qalır. Biz onları hörmətli cənab Prezidentimizin iştirakı ilə böyük ümidlərlə yola salır və inanırıq ki, bu etimadı doğruldacaqlar. Diqqətinizə görə sağ olun.

X X X

Sonra sərbəst güləş üzrə məşqçi Yaqub Məmmədova söz verildi.