GƏNCLƏR TƏŞKİLATLARININ NÖVBƏTİ YIĞINCAĞI KEÇİRİLMİŞDİR

11.04.2006 [20:42]
Çap et
A⁺ A^-

AZƏRTAC xəbər verir ki, Azərbaycan Respublikası Gənclər Təşkilatları Milli Şurasının (ARGTMŞ) X hesabat-seçki konfransı keçirilmişdir. ARGTMŞ–in onillik tarixi ilə üst-üstə düşən tədbirdə 65 üzv təşkilatın nümayəndələri ilə yanaşı, Gənclər və İdman Naziri Azad Rəhimov, nazirin müavini İntiqam Babayev, Ailə, Qadın və Uşaq Problemləri üzrə Dövlət Komitəsinin sədri Hicran Hüseynova, Milli Məclisin deputatları, Prezidentin İcra Aparatının məsul işçiləri və Türkiyə Gənclər Təşkilatının əməkdaşları da iştirak etmişlər.

Konfransda son bir ildə həyata keçirilən genişmiqyaslı layihələr, Dövlət Gənclər Siyasətinin icrası istiqamətində atılmış addımlar, Azərbaycan həqiqətlərinin dünya ictimaiyyətinə çatdırılması işində gənclərimizin rolu barədə geniş müzakirələr aparılmışdır.

ARGTMŞ-nin sədri, Milli Məclisin deputatı Fuad Muradov çıxışında rəhbərlik etdiyi qurumun demokratiyanın inkişafı və ölkəmizin müstəqilliyinin möhkəmlənməsində yaxından iştirak etdiyini bildirmiş və hazırda, Bakı da daxil olmaqla, respublikamızın bir çox regionlarında davam etməkdə olan və orta məktəb şagirdləri üçün nəzərdə tutulmuş “Demokratiya və Vətəndaş Cəmiyyəti” layihəsinin də bu istiqamətdə atılmış ən uğurlu addım olduğunu nəzərə çarpdırmışdır.

Konfransdakı çıxışlarda ölkənin ictimai-siyasi həyatındakı ARGTMŞ–nin rolu xüsusi vurğulanmışdır.

Sonda ARGTMŞ rəhbər orqanlarına seçkilər keçirilmişdir. Fuad Muradov növbəti 2 il müddətinə ARGTMŞ-nin sədri seçilmişdir.