GERHARD ŞRÖDER İKİNCİ DƏFƏ ALMANİYANIN KANSLERİ SEÇİLMİŞDİR
Almaniya Sosial-Demokrat Partiyasının sədri Gerhard Şröder yenidən AFR-in kansleri seçilmişdir. Prezident Yohannes Raunun irəli sürdüyü bu namizədə bundestaq deputatlarının böyük əksəriyyəti - 305 nəfər səs vermişdir.
Bu vəzifəyə seçilmək üçün Şröder azı 302 səs qazanmalı idi. Gizli səsvermədə bundestaqın 603 deputatından 599-u iştirak etmişdir. Müxalifət partiyaları təmsilçilərinin, demək olar, hamısı Şröderin əleyhinə səs vermiş, iki deputat bitərəf qalmışdır.
Almaniyanın yeni hökumətinin başçısı fəhlə ailəsində altı uşaqda biri olmuşdur. Atası İkinci dünya müharibəsi zamanı Rumıniyada həlak olmuşdur. 1963-cü ildə ASDP-yə daxil olan Gerhard Şröderin siyasi fəaliyyəti “Gənc sosialistlər” təşkilatında başlanmışdır. O, 1978-ci ildən bu təşkilata başçılıq etmişdir. 1980-ci illərdə bundestaqın deputatı seçilmişdir, 90-cı illərdə isə Aşağı Saksoniyada sosial demokratların ərazi təşkilatına rəhbərlik etmiş, 1990-1998-ci illərdə bu federal ərazinin baş naziri olmuşdur. Şröder 1998-ci ildən federal kanslerdir.
İTAR-TASS xəbər verir ki, çərşənbə axşamı yeni nazirlər kabineti üzvlərinin andiçmə mərasimi keçiriləcəkdir.
Bölmənin digər xəbərləri
