GÖRKƏMLİ FİLOSOF ALİM, AKADEMİK HEYDƏR HÜSEYNOVUN 100 İLLİK YUBİLEYİ QEYD OLUNACAQDIR
AZƏRTAC xəbər verir ki, Azərbaycanın görkəmli filosof alimi, SSRİ Dövlət mükafatı laureatı, akademik Heydər Nəcəf oğlu Hüseynovun 100 illik yubileyi qeyd olunacadır. Bu barədə Prezident İlham Əliyev iyulun 11-də Sərəncam imzalamışdır.
Sərəncamda deyilir ki, Azərbaycan Elmlər Akademiyasının ilk akademiklərindən olan Heydər Hüseynovun ölkəmizdə ictimai və humanitar elmlərin, xüsusilə fəlsəfənin inkişafında müstəsna rolu vardır. Milli mədəniyyətimizin böyük nümayəndələrinin fəlsəfi irsini sistemli araşdıran alim, xalqımızın fəlsəfi fikir tarixinin başlıca təkamül mərhələlərini müəyyənləşdirmişdir. O, özünün zəngin fəaliyyəti ilə ictimai-siyasi fikrin öyrənilməsinə istiqamət verərək, bu sahədə yeni tədqiqatların vüsət almasına əlverişli zəmin hazırlamışdır.
Heydər Hüseynovun Azərbaycan elmi-fəlsəfi fikrinin daha da inkişaf etdirilməsində təqdirəlayiq xidmətləri vardır.
Sərəncama əsasən, AMEA Təhsil Nazirliyi ilə birlikdə Heydər Hüseynovun 100 illik yubileyinə həsr olunmuş tədbirlər planı hazırlayıb həyata keçirəcəklər.
Bölmənin digər xəbərləri
