“Göy qurşağı” jurnalının növbəti nömrəsi çapdan çıxmışdır
Bakı, 30 oktyabr (AZƏRTAC). “Göy qurşağı” uşaq jurnalının 2013-cü il sentyabr-oktyabr nömrəsi çapdan çıxmışdır.
AZƏRTAC xəbər verir ki, F.Köçərli adına Respublika Uşaq Kitabxanasının təşkilati dəstəyi ilə nəşr olunan jurnalın təsisçisi Əməkdar Mədəniyyət İşçisi Fizurə Quliyeva, baş redaktoru Ülviyyə Gülməmmədovadır.
Jurnal həmişə olduğu kimi, bu dəfə də balaca oxucularının görüşünə maraqlı yazıları, göy qurşağı kimi əlvan şəkilləri ilə gəlmişdir.
Jurnalın bu nömrəsində Azərbaycanın dövlət müstəqilliyinin bərpasına, 5 oktyabr-Beynəlxalq Müəllimlər Gününə həsr edilmiş şeirlər və digər yazılar öz əksini tapmışdır. Həmçinin F.Köçərli adına Respublika Uşaq Kitabxanasının ölkəmizin Yaponiyadakı səfirliyi ilə əlaqəsi də oxucularımız üçün maraqlı olacaqdır.
Jurnalın səhifələrində balaca oxucular həmyaşıdlarının yaradıcılığı ilə yaxından tanış ola bilərlər. Son nömrədə, həmçinin balaca rəssamların “Mənim rəng dünyam”, “Özün düzəlt”, “Nələr olur dünyada” və digər rubrikalarda çəkdikləri şəkillər, сanlılar aləminə dair maraqlı faktlar, müxtəlif ölkələr, məntiqi suallar, lətifələr və s. maraqlı məlumatlar yer almışdır.
Bölmənin digər xəbərləri
