GÖYÇAYDA ƏKİN SAHƏLƏRİNƏ SUYUN ÇATDIRILMASI ÜÇÜN MÜHÜM İŞLƏR GÖRÜLÜR
Göyçay, 15 aprel (AZƏRTAC). Göyçay rayonunda əkin sahələrinin suvarılması və sel sularından mühafizəsi məqsədi ilə mühüm işlər görülür. Rayon suvarma sistemləri idarəsindən bildirmişlər ki, Göyçayda əhalinin suvarma suyuna olan tələbatının yaxşılaşdırılması, təsərrüfatlararası suvarma arxlarının lil və çöküntülərdən təmizlənməsi işləri uğurla davam etdirilir. Ötən 3 ay ərzində rayonun Hacalıkənd, Qarabaqqal, Qarayazı kəndlərinin su arxları yenidən qazılmışdır. Hazırda Bəydövül, Mirzəhüseynli, Alpoud kəndlərində də oxşar işlər görülür.
Göyçay şəhərinin daxili arxları da lil və çöküntülərdən təmizlənir. Bu məqsədlə hazırda suvarma sistemləri idarəsinin 15-dək müxtəlif təyinatlı texnikası yaşayış məntəqələrinə cəlb olunmuşdur. Cari ildə rayonda 100 kilometr uzunluğunda suvarma arxlarının yenidən qazılması nəzərdə tutulur.
Bundan əlavə, suvarma sistemləri idarəsinin briqadası yaşayış məntəqələrinin və əkin sahələrinin sel sularından mühafizəsi məqsədi ilə Göyçay çayında sahilbərkitmə işlərinə başlamışdır. Cari ildə çayın mühafizə zolağının 500 metrlik hissəsində beton bəndin quraşdırılması nəzərdə tutulur.
Bölmənin digər xəbərləri
