GÜCLÜ KÜLƏK ƏN ÇOX ELEKTRİK ENERJİSİ TƏCHİZATINA ZƏRƏR VURMUŞDUR

10.11.2006 [11:10]
Çap et
A⁺ A^-

AZƏRTAC xəbər verir ki, noyabrın 8-də Ağsuda günortadan başlayan güclü külək axşam saat 18-dək davam etmiş, əhaliyə, xüsusən elektrik enerjisi təsərrüfatına xeyli ziyan vurmuşdur.

Ağsu Rayon İcra Hakimiyyəti başçısının müavini, rayon fövqəladə hallar komissiyasının sədri Rasim Novruzov bildirmişdir ki, külək ən çox rayonun düzən ərazilərində fəsadlar törətmişdir. İlkin məlumata görə, külək rayon mərkəzində və kəndlərdə yüzlərlə ağacı kökündən qoparmış, 10-dək köhnə binanın dam örtüyünü uçurmuş, elektrik enerjisi təchizatı kəsilmişdir. Elektrik verici xətlərində 30-dək dayaq aşmış, məftillər qırılmış, şəhərin Ağa Osmanov küçəsində 100 kilovoltluq transformator qəza vəziyyətinə düşmüşdür.

Gecə ikən yaradılan xüsusi briqada səhər saat 9.00-dək şəhərdə enerji təchizatını qismən bərpa etmişdir. Elektrik verici xətlərində bərpa işləri davam etdirilir.

Noyabrın 10-da axşamadək rayonda elektrik enerjisi təchizatı tamamilə bərpa ediləcəkdir.