ŞƏRH
Günəş, külək, bioqaz, xüsusilə də hidrogen enerjisinin istehsalına diqqətlə yanaşılmalıdır ŞƏRH
Bakı, 7 iyun, AZƏRTAC
Bakı Enerji Həftəsinin ölkəmizdə keçirilməsi çox böyük əhəmiyyət daşıyır. Artıq dünyanın neft-qaz sənayesinin əsas hadisəsinə çevrilmiş və beynəlxalq müstəvidə tanınmış platforma olan bu sərgi və konfrans 30 ildir ki, Xəzər regionunun əsas neft-qaz layihələrini və enerji təhlükəsizliyinin təminatını, enerji sektorunda innovasiya, tərəqqi və əməkdaşlığı müzakirə etmək üçün ən yüksək səviyyəli rəhbərləri bir araya gətirir. Ölkəmiz hər zaman beynəlxalq ekoloji təşəbbüslərdə mühüm rol oynayıb. Yaşıl enerji, ekoloji davamlılıq Azərbaycanın inkişaf strategiyasında öncül yer tutur. Azərbaycanın COP29-a ev sahibliyi etməsi heç də təsadüf deyil. Hazırda haqlı olaraq dövlətimiz bu istiqamətdə ciddi işlər aparır. Azərbaycanda qeyri-ənənəvi enerjinin alınması üçün çox yaxşı şərait var.
Bu sözləri AZƏRTAC-a açıqlamasında Beynəlxalq Ekoenergetika Akademiyasının prezidenti, Oksford universitetinin fəxri professoru Fəqan Əliyev söyləyib.
O bildirib ki, rəsmi məlumatlara görə, yaşıl enerjinin aparıcı qüvvəsi kimi bərpaolunan enerji mənbələri 2026-cı ilədək Azərbaycanda elektrik enerjisi istehsalının 24 faizini təşkil edəcək. 2030-cu ildə isə bu, 30 faizə çatacaq. 2050-ci ilədək ölkəmiz istixana qazı emissiyalarını 40 faiz azaltmağı hədəfləyir. İndi ölkədə həm Günəş, həm də külək enerjisindən istifadə üçün yeni bir mərhələ başlayıb. Bu, çox müsbət amildir. İşğaldan azad edilmiş ərazilərdə və Qaradağda Günəş, Xəzər dənizində külək enerjisindən istifadə ediləcək. Artıq bu işin təməli qoyulub və inkişaf getdikcə artacaq.
“Zəmanəmiz enerji, enerjiyə qənaət, enerji effektivliyi yaradan texnologiyaların kompüterləşməsi, binaların distant idarə olunması zəmanəsidir. Proqramlaşmış kompüter sistemlərinin qurulması, istilik sistemlərinin optimallaşdırılması, elektrik və enerji sistemlərinin məlumat bazasının əsasında idarə olunması artıq 1970-ci illərdən etibarən inkişaf etmiş ölkələrdə ciddi işlənilir və həyata keçirilir. Bakıda, Abşeronda yeni binalar tikilir. Heç birində istər Günəş qurğuları, istərsə də fotoelementlərin çevrilişini aparmaqla işləyən panellər və ya müxtəlif elektrik enerjisi yaradan qurğular yoxdur”, - deyə Beynəlxalq Ekoenergetika Akademiyasının prezidenti qeyd edib.
O deyib ki, dövlətimizin başçısı prinsipial məsələləri çox müvəffəqiyyətlə həll edir. Yeni nəslin inkişafına dəstək verən Heydər Əliyev Fondu da qarşıya çıxan problemlərin öhdəsindən uğurla gəlir. Azərbaycanın çox bacarıqlı, ağıllı, Vətənini sevən, bilikli gəncləri var. Dünyanın elə bir ölkəsi yoxdur ki, bizim gənclərimiz, xalqımızın nümayəndələri orada mühəndis kimi işləməsin. Kompüter proqramçıları, mühəndislər, dəqiq elmlərin nümayəndələri dünya arenasında müvəffəqiyyət qazanıblar. Azərbaycanlılar Vətənini, dövlətini, xalqını, Prezidentini sevir. Ermənilərdən fərqli olaraq övladlarımız bir-birinə daha istiqanlı yanaşırlar. Hazırda ölkəmizə xarici investorlar tərəfindən böyük axın müşahidə olunur.
Ətraf mühitin qorunmasının önəmini xüsusi qeyd edən F.Əliyev deyib: “İşğaldan azad edilmiş Qarabağda olduğu kimi, Abşeronun, Bakının ekologiyasını da qorumalıyıq. Binalarda səmərəli enerji və bərpaolunan enerji texnologiyalarının tətbiqi, ekoloji təhlükənin qiymətləndirilməsi və radiasiya təhlükəsizliyi kimi mövzular hazırda çox aktualdır. Düşünürəm ki, süni yaradılmış göllər, çirklənmiş torpaqlar təmizlənməlidir. Tullantıları utilizasiya edək, yeni texnologiyalarla xalqımızı tullantı bəlasından xilas edək. Dövlətimiz kifayət qədər mühüm işlər görür. Elektrik avtomobillərinin ölkəmizdə istifadəsinə və bu sahənin inkişafına dövlətimiz əlverişli şərait yaradır, onları gömrük rüsumundan azad edir. Günəş, külək, bioqaz, xüsusilə də hidrogen enerjisinin istehsalına diqqətlə yanaşılmalıdır. Yeni nəslin inkişafına dair proqramlar yaradılmalıdır. Bizim bir ölkəmiz var. Gedəcək yerimiz olsa da, əbədi qalacağımız yer Azərbaycandır”, - deyə F.Əliyev vurğulayıb.