Gürcüstan azərbaycanlıları dövlət strukturlarında ödənişli təcrübə proqramında iştirak edəcəklər
Tbilisi, 2 sentyabr, AZƏRTAC
Gürcüstan Baş nazirinin qərarı ilə dövlət strukturlarında 3000-dən çox vakansiyanı əhatə edən ödənişli təcrübə proqramı elan edilib.
AZƏRTAC xəbər verir ki, bu barədə Gürcüstan Hökuməti Administrasiyasının rəhbəri Levan Jorjoliani bildirib. Onun sözlərinə görə, proqram tələbələrə ali təhsildə əldə etdikləri bilikləri praktikada tətbiq etməyə imkan verir. Bu da onların gələcək karyera yüksəlişlərinə kömək edəcək.
"Bu proqram ümumilikdə 4-cü kurs tələbələri, eləcə də magistr tələbələri, bakalavr dərəcələri üzrə məzunlar üçün vacibdir. Bununla onların ali təhsil müəssisələrində aldıqları nəzəri biliklər əsasında praktik bilik və təcrübə qazana bilərlər ki, bu da onların gələcək karyera inkişafı üçün çox vacibdir", - deyə L.Jorjoliani bildirib.
Qeyd edək ki, artıq Gürcüstan Parlamenti, müvafiq nazirliklər vakansiyalar elan ediblər. Gürcüstanda yaşayan azərbaycanlı gənclər də proqramda iştirak etmək üçün müvafiq qurumlara müraciət ediblər.
Bölmənin digər xəbərləri
