Gürcüstan hökuməti cari ildə dini icmalarının maliyyələşdirilməsi üçün 6,5 milyon lari vəsait ayırıb
Tbilisi, 3 fevral, AZƏRTAC
Gürcüstan hökuməti 2024-cü ildə ölkənin dini icmalarının maliyyələşdirilməsi üçün 6,5 milyon lari vəsait ayırıb.
AZƏRTAC xəbər verir ki, bu barədə Gürcüstanın Dini Qurumlarla İş üzrə Dövlət Agentliyi məlumat yayıb.
Vəsaitin 1 milyon larisi 4 dini qurum (İslam, yəhudi, roma-katolik və erməni-apostol) arasında bölüşdürüləcək. Bu vəsait sovet dövründə dini icmalara dəymiş mənəvi zərərin qismən kompensasiyası üçün nəzərdə tutulub. Bir milyon lari məbləğində vəsait Gürcüstan hökumətinin Ehtiyat Fondundan ayrılacaq.
Bildirilir ki, Gürcüstan hökuməti dini təşkilatların maliyyələşdirilməsinin artırılmasında icmalara mənsub olanların, din xadimləri və ibadət yerlərinin sayını nəzərə alıb. Müvafiq qərar Gürcüstanın Dini Məsələlər üzrə Dövlət Agentliyi ilə məsləhətləşmələr əsasında qəbul edilib.
Qeyd edək ki, Gürcüstan hökuməti keçən il dini icmalara yardım məqsədilə 5,5 milyon, 2022-ci ildə isə 4,5 milyon lari məbləğində vəsait ayırmışdı.
Xatırladaq ki, Gürcüstan əhalisinin 11 faizə yaxınını müsəlmanlar təşkil edir.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
