GÜRCÜSTAN TEATRININ QASTROLLARI
Azərbaycan Dövlət Musiqili Dram Teatrında Rustavi Dövlət Gürcü Dram Teatrının qastrolları başlanmışdır. Bakı tamaşaçılarına Şekspirin ölməz “Hamlet” dramı və dramaturq O.İoselianinin SSRİ xalq artisti, “Əsgər atası” filmində baş rolun ifaçısı kimi məşhur olan Serqo Zakariadzenin xatirəsinə həsr edilmiş “Araba çevrildi” pyesi təqdim olunmuşdur.
Mədəniyyət nazirinin müavini Ədalət Vəliyev açılış mərasimində çıxış edərək, gürcü teatrının bu səfərini humanitar sahədə Azərbaycan-Gürcüstan əlaqələrinin inkişafına töhfə verəcək əlamətdar hadisə kimi qiymətləndirdi. O, hər il “Qızıl maska” beynəlxalq teatr festivalının keçirildiyi Gürcüstanın zəngin teatr ənənələrini və bu tədbirlərdə H.Ərəblinski adına Sumqayıt Dövlət Musiqili Dram teatrının uğurlu çıxışlarını xatırlatdı.
Gürcüstanın Azərbaycandakı səfiri Zurab Qumberidze qastrolun təşkilatçılarına minnətdarlıq etdi və ümidvar olduğunu bildirdi ki, bakılılar gürcü aktyorlarının sənətini layiqincə qiymətləndirəcəklər.
Sonra “Hamlet” tamaşası nümayiş etdirildi. Tamaşaçılar, o cümlədən gürcü diasporunun, Azərbaycan ictimaiyyətinin nümayəndələri, mədəniyyət xadimləri bu əsərin müasir quruluşunu maraqla qarşıladılar.
Bölmənin digər xəbərləri
