GÜRCÜSTAN ÜMUMTƏHSİL MƏKTƏBLƏRİNİN DİREKTORLARI YENİ PRİNSİP ƏSASINDA SEÇİLƏCƏKDİR
AZƏRTAC-ın xüsusi müxbiri Gürcüstan Təhsil və Elm Nazirliyinə istinadla xəbər verir ki, ölkənin ümumtəhsil məktəbləri direktorlarının seçkisi yeni prinsip əsasında keçiriləcəkdir.
Direktorların yeni seçkisi zamanı məktəblərə daha çox muxtariyyət veriləcəkdir. Məktəblərin ehtiyacları əsas götürülərək onlar üçün fərdi tələbləri məktəbin qəyyumlar şurası müəyyənləşdirəcəkdir. Direktorluğa namizədlərin bölüşdürülməsi qaydasında da yeniliklər nəzərdə tutulur. Onların coğrafi prinsipə görə bölüşdürülməsi qaydası ləğv ediləcəkdir. Bu o deməkdir ki, hər bir iddiaçı bir neçə məktəbin direktorluğuna namizədliyini irəli sürə bilər. Müsabiqənin qalibləri ilə Təhsil və Elm Nazirliyində söhbət aparılması qaydası ləğv ediləcəkdir.
Nazirlik yalnız testləşdirmə keçirəcəkdir. Bu qayda gürcüdilli və qeyri-gürcüdilli məktəblər üçün müxtəlif olacaqdır. Qeyri-gürcüdilli məktəblərdə direktorluğa namizədlərə gürcü dili üzrə treninqdən keçmə imkanı veriləcəkdir.
Xatırladaq ki, hazırda Gürcüstanda 2.234 məktəb fəaliyyət göstərir. Onların yalnız 45 faizini direktor vəzifəsinin icraçıları idarə edirlər. Qalan məktəblərin qəyyumlar şurası isə direktoru ötən il seçmişdir. Bu ilin payızında 1000-dən çox məktəbdə direktor vəzifəsini tutmaq üçün müsabiqə elan ediləcəkdir.
Bölmənin digər xəbərləri
