GÜRCÜSTANIN BAKIDAKI SƏFİRİ MƏTBUAT KONFRANSI KEÇİRMİŞDİR
AZƏRTAC xəbər verir ki, avqustun 9-da Gürcüstanın Azərbaycandakı səfirliyi ölkəsində münaqişə bölgəsindəki vəziyyətlə bağlı bəyanatla çıxış etmişdir. Səfir Nikoloz Natbiladze əvvəlcə bəzi kütləvi informasiya vasitələrində birtərəfli məlumatların yayılmasından narahatlığını bildirmişdir.
Ölkəsindəki hadisələr barədə məlumat verən diplomat, hazırda separatçı dəstələrin Gürcüstanın şəhərlərini bombardman etdiyini, beynəlxalq normaları pozduğunu vurğulamışdır. “Söhbət Gürcüstana qarşı açıq hərbi əməliyyatlardan gedir”, - deyən Nikolo Natbiladze bildirmişdir ki, Sxinvali uğrunda ağır döyüşlər davam edir. Separatçıların yuvası Cavi kəndi istisna olmaqla, bölgə Gürcüstan qüvvələrinin nəzarəti altındadır.
Azərbaycan Xarici İşlər Nazirliyinin Gürcüstandakı hadisələrlə bağlı bəyanatından xəbərdar olduğunu vurğulayan diplomat rəsmi Bakının Gürcüstanın ərazi bütövlüyünü dəstəklədiyinə görə minnətdarlığını bildirmişdir.
Diplomat sonda bir daha vurğulamışdır ki, Gürcüstan ərazi bütövlüyü uğrunda başladığı mübarizəni axıradək aparacaqdır.
Bölmənin digər xəbərləri
