HAMBURQ LIMANINDA 2,2 TON MARIXUANA TUTULMUŞDUR

24.09.2004 [16:36]
Çap et
A⁺ A^-

AZƏRTAC-ın xüsusi müxbiri Berlindən xəbər verir ki, Almaniya gömrük xidmətinin işçiləri Hamburq limanına gəlmiş Yamayka gəmisində yoxlama aparan zaman gəminin yükü arasında məharətlə gizlədilmiş 2,2 ton ağırlığında marixuana aşkar etmişlər.

Gömrük xidməti əməkdaşlarının və polisin məlumatlarına görə, bu, son üç il ərzində Almaniya ərazisində tutulan ən irihəcmli narkotikdir və qara bazarda 6,6 milyon avro məbləğində qiymətləndirilir. Gömrük yoxlaması zamanı sahilə çıxmaq bəhanəsi ilə gəmini tərk edərək yayınan narkotiklərin sahibləri - 57 yaşlı ata və 39 yaşlı oğul Düsseldorf şəhərində yaxalanmışlar. Onlar Hollandiya vətəndaşlarıdır.

X X X

BERLİNDƏ 9,25 MİLYON ƏDƏD

SİQARET MÜSADİRƏ OLUNMUŞDUR

Berlin-Brandenburq federal əyalətlərinin gömrük xidməti işçiləri yük gəmisində Çindən Hamburq limanına, oradan isə Berlinə gətirilməsi nəzərdə tutulan çayla dolu konteynerlərin birinin içərisindən 9,25 milyon ədəd siqaret müsadirə etmişlər.

Siqaretlərin Çində Amerika markaları və lisenziyaları adı altında saxta yolla istehsal edildiyi məlum olmuşdur.