HƏMAS-ın hücumu nəticəsində ölən fransalıların sayı 39-a yüksəlib
Bakı, 4 noyabr, AZƏRTAC
HƏMAS hərəkatının İsrailin nəzarətində olan ərazilərə hücumu nəticəsində həlak olan Fransa vətəndaşlarının sayı 39 nəfərə yüksəlib.
AZƏRTAC xəbər verir ki, bu barədə məlumat Fransa Xarici İşlər Nazirliyinin saytında yerləşdirilib.
“Fransa təəssüflə daha bir vətəndaşının faciəvi surətdə öldüyünü bildirir. Beləliklə, HƏMAS hərəkatının hücumu nəticəsində həlak olan fransalıların sayı 39 nəfərə çatıb”, - deyə nazirlikdən bildiriblər.
Xarici siyasət idarəsinin məlumatına görə, regionda doqquz Fransa vətəndaşı itkin düşüb. Onların bəzilərinin HƏMAS-ın əsirliyində olduğu istisna edilmir.
Xatırladaq ki, oktyabrın 7-də HƏMAS hərəkatının silahlı qanadı olan “İzzəddin əl-Kassam” briqadasının İsrailin nəzarətində olan ərazilərə hücumlarından sonra Yaxın Şərqdə vəziyyət gərginləşib. İsrail tərəfi HƏMAS-ın hücumuna cavab olaraq Qəzza sektoruna, Livan və Suriyanın ayrı-ayrı rayonlarına zərbələr endirib və Fələstin eksklavında yerüstü əməliyyata başlayıb.
Bölmənin digər xəbərləri
