HƏMYERLİMİZİN ADI GENNESİN REKORDLAR KİTABINA DÜŞMÜŞDÜR
AZƏRTAC-ın xüsusi müxbiri xəbər verir ki, həmvətənlimiz 5 dəqiqəyə 20 nəfərin kölgəsini (siluetini) çəkməklə bu şərəfə nail olmuşdur.
Uşaqlıqdan rəsm əsərləri çəkməyi xoşlayan Fəxrəddin Vəliyev həyatının 25 ilini qrafika sənətinə və kölgə rəsmləri çəkməyə həsr etmişdir. Onun 1992-ci və 1995-ci illərdə Afinada və İstanbulda fərdi sərgiləri təşkil edilmişdir. Həmyerlimiz 2003-cü ilin dekabr ayında Brüssel şəhərindəki məşhur Belqium muzeyində ölkənin kraliçası Fabiolanın rəsmini çəkmişdir. Əsər kraliçanın çox xoşuna gəlmiş və Belçikanın birinci xanımı gözəl sənət əsərinə görə həmyerlimizə məktub vasitəsi ilə öz təşəkkürünü bildirmişdir.
Vətənimizin Belçikada tanınması və onun barəsindəki həqiqətlərin yerli sakinlərə çatdırılması sahəsində yorulmadan təbliğat aparan Fəxrəddin Vəliyev həm də bu ölkədə fəaliyyət göstərən Avropa-Azərbaycan diaspor mərkəzinin vitse-prezidentidir.
