İkinci Qarabağ müharibəsindəki Zəfər Azərbaycan durduqca qəlbimizdə, yaddaşımızda qalacaq

Bakı, 11 may, AZƏRTAC

Prezident İlham Əliyevin Şuşada Ümummilli Lider Heydər Əliyevin 100 illik yubileyi münasibətilə Azərbaycan xalqına müraciətində səsləndirdiyi fikirlər Vətən müharibəsində Qələbəmizin həqiqətən tarixi uğur olduğunu göstərir. Dövlətimizin başçısı qeyd edir ki, Azərbaycan durduqca bu Zəfər bizim qəlbimizdə, yaddaşımızda, kitablarda, əsərlərdə qalacaq. Bu, misli görünməmiş qəhrəmanlıq dastanıdır. İkinci Qarabağ müharibəsi bütün dünyaya Azərbaycan xalqının əyilməz ruhunu göstərdi. Bizi müharibədə Qələbəyə aparan məhz bu idi. Belə ki, vaxtilə qondarma rejimin sabiq müdafiə naziri Seyran Ohanyan "Azərbaycanın onurğa sütununu qırmışıq və heç zaman Azərbaycan bu torpaqları müharibə ilə geri almaq gücünə malik olmayacaq" ifadəsi işlətmişdi, yaxud ermənilər digər sərsəm bəyanatlar vermişdi, Şuşada yallı getmişdilər. XXI əsrin müharibəsini aparan Azərbaycanın döyüş təcrübəsi və taktikası bu gün dünyanın inkişaf etmiş ölkələrinin hərbi məktəblərində öyrənilir. Son dərəcə çətin relyef şəraitində cəmi 44 gün ərzində ən müasir döyüş silahlarının tətbiqi ilə şanlı Qələbə qazanan Azərbaycan Ordusu yüksək peşəkarlıq nümayiş etdirdi. Ordumuz İkinci Qarabağ müharibəsində ilk gündən düşmənin bir neçə eşalon müdafiə xəttini yararaq sonrakı günlərdə yalnız irəli getdi. Bu, Azərbaycan Silah Qüvvələrinin 44 gün ərzində həqiqətən XXI əsrin ən qısa müddətli savaşını apardığının bariz nümunəsidir.

Bu fikirləri AZƏRTAC-a müsahibəsində Həmvətənlərə Dəstək İctimai Birliyinin təsisçisi, Qarabağ müharibəsi veteranı, ehtiyatda olan polkovnik-leytenant, hərbi-siyasi ekspert Elmar Hüseyn deyib.

O xatırladıb ki, İkinci Qarabağ müharibəsindəki uğur son 200 il ərzində apardığımız döyüşlərdə, Azərbaycan Xalq Cümhuriyyəti dövründən əldə etdiyimiz zəfərlərin itirilməsi fonunda unudulmaz və tarixdə qalacaq qələbəmizdir.

Məhz Ümummilli Lider ordu quruculuğu sahəsində milli kadrların yetişdirilməsi, onların təhsilində və vəzifəyə təyin olunması prosesləri ilə şəxsən maraqlanıb. Bu yaxınlarda dahi şəxsiyyətin 100 illik yubileyi ərəfəsində xaricdə təhsil alan bir neçə həmvətənlərimizlə görüşdüm. Onların hər biri xatırlayırlar ki, Heydər Əliyevin Prezident olduğu zamanda və hər hansı xarici ölkəyə səfər edəndə oradakı Azərbaycan gəncləri, tələbələri ilə görüşür, onların təhsil aldıqdan sonra Vətənə qayıtmasını tövsiyə edirdi. Bu, Azərbaycanda milli kadr potensialının artmasına səbəb olub.

Hərbi-siyasi ekspertin sözlərinə görə, hərbi peşə sahəsində də C.Naxçıvanski adına Hərbi Lisey ilə yanaşı, ozamankı Bakı Birləşmiş Ali Komandanlıq Məktəbinə bir neçə dəfə səfər edən Heydər Əliyevin hərbi ədəbiyyatın doğma dilimizə tərcüməsi ilə bağlı tapşırıqları və zabitlərimizin bu kitablardan istifadə edərək hərb sənətinə yiyələnməsi milli kadrların Vətən müharibəsində qələbə ruhunda yetişməsi ilə nəticələnib. Ümummilli Lider Heydər Əliyev ordu quruculuğu sahəsində də bir neçə əsas istiqaməti əsas tutmuşdu. Bunlardan biri zabitlərimizin NATO ölkələrində təlimlərdə iştirakı, digəri Türkiyə ilə bu sahədə əməkdaşlıq, eləcə də Rusiyadakı hərbi akademiyalarda zabitlərin təhsil alması.

Ehtiyatda olan polkovnik-leytenant vurğulayıb ki, peşəkar Azərbaycan Ordusunun əsaslarının Heydər Əliyev tərəfindən qoyulduğunu bildirən Prezident İlham Əliyev Şuşadakı müraciətində deyib: “Heydər Əliyevin ordu quruculuğu sahəsində çox böyük xidmətləri olmuşdur. Məhz onun fəaliyyəti nəticəsində nizami ordu yaradılmışdır. Düzdür, o vaxt bizim maliyyə imkanlarımız məhdud idi, orduya lazımi qədər vəsaitin ayrılması mümkün deyildi...Vəsaitin qıtlığına baxmayaraq, ordu quruculuğu üçün çox ciddi addımlar atılmışdır”.

Qarabağ müharibəsi veteranı bildirib ki, Vətən müharibəsi dövründə Milli Qəhrəmanımız Şükür Həmidov, eyni məktəbdə oxuduğumuz Polad Həşimov, o dövrdə gördüklərimizi, o hissləri gənclərimizə bir daha xatırlatmaq istəyirəm. Birinci Qarabağ müharibəsi vaxtı evimizdə valideynlərimizin ağladığını görürdük. Ölkə parçalanırdı, şimaldan bir qrup, cənubdan başqa qruplar meydana çıxmışdı. Ulu Öndər o zaman hakimiyyətdə olsaydı biz bu fəlakətlərlə üzləşməzdik, Birinci Qarabağ savaşında çoxlu itkilərimiz olmazdı. 1991-ci ilin 20 Yanvar hadisələri zamanı Azərbaycanın Moskvadakı nümayəndəliyə gələn Ulu Öndər Heydər Əliyevin və Ali Baş Komandanımız İlham Əliyevin arxasında üçrəngli Azərbaycan bayrağı dalğalanırdı. Həmin bayrağımızı yüz il əvvəl bolşeviklər məhv etmişdi. Məhz Heydər Əliyev o məşhur çıxışı ilə bayrağımızı orada təqdim edərək və xalqın iradəsini ifadə etdi.

“Dövlət başçımızın dediyi kimi, Qarabağı, Zəngəzuru ovaxtkı gənclər və son 20 il ərzində yetişmiş gənclər azad etdi. Biz gənc nəslə o hissləri aşılamalıyıq. Heydər Əliyev gənclər yetişdirdi və hərb sahəsinə yönəltdi. O vaxt Heydər Əliyev ali hərbi məktəbə gələndə rus dilindəki kitabların Azərbaycan dilinə tərcümə olunmasını tapşırdı. Bu gün Vətən müharibəsində iştirak etmiş zabitlərimiz o dərsliklərdən istifadə edərək Prezident İlham Əliyevin ifadə etdiyi kimi keçilməz Ohanyan xəttini yaran ləyaqətli gənclər kimi yetişdi. Biz valideynlərimizdən eşidirdik ki, Azərbaycan xalqını fəlakətdən ancaq bir nəfər - Heydər Əliyev xilas edə bilər. O vaxt ölkədə vətəndaş müharibəsi baş vermişdi, Gəncə terroru olmuşdu. Bütün bunların hamısı isə Azərbaycanın parçalanmasına yönəlmişdi”, - deyə Elmar Hüseyn vurğulayıb.

Prezident İlham Əliyev Şuşada Ümummilli Lider Heydər Əliyevin 100 illik yubileyi münasibətilə Azərbaycan xalqına müraciətində bu barədə deyib: “Gənc nəsil milli-mənəvi dəyərlərə bağlı olmalıdır, öz ədəbiyyatına, musiqisinə, incəsənətinə bağlı olmalıdır və biz bunu görürük, biz gəncləri belə yetişdiririk. Elə gənclər yetişdirmişik ki, bu gənclər dağı dağ üstə qoya bilər və əslində, bunu da etdilər. İkinci Qarabağ müharibəsi Azərbaycan xalqının əyilməz ruhunun təntənəsi idi. Biz elə bir gənc nəsil yetişdirdik ki, onlar həm yüksək mənəvi, həm də yüksək fiziki keyfiyyətlər göstərərək, uzun illər ərzində işğal altında olan torpaqları azad etdilər və Şuşa kimi alınmaz qalanı faktiki olaraq yüngül silahlarla, əliyalın azad etdilər. Nə idi bizi qabağa aparan? Ləyaqət və ruh!”.

Dövlətimizin başçısı Şuşada Azərbaycan xalqına müraciətində ordu quruculuğu işində bu gün də sistemli fəaliyyət göstərildiyini vurğulayıb. Azərbaycan Ordusunun həm təchizat, həm döyüş qabiliyyəti nöqteyi-nəzərdən dünyanın ən güclü orduları sırasında olduğunu deyib: “Bizim ordumuz döyüşüb, bizim ordumuz öz gücünü paradda yox, döyüş meydanında göstərib. 44 gün ərzində bir nəfər də olsun geri addım atmayıb, bir nəfər də olsun fərari olmayıb. Bizim ordumuz budur. Bizim xalqımız budur. Çünki ordu xalqın bir hissəsidir. Orduda xidmət edən xalqın övladlarıdır, bizim yetişdirdiyimiz uşaqlardır. Biz belə gözəl uşaqlar yetişdirmişik ki, onlar düşməni burada, Şuşada əliyalın məğlub edib, düşməni torpaqlarımızdan çıxarıb, bizim qürur rəmzimiz olan bayrağımızı, bax, bu binaya və azad edilmiş bütün başqa torpaqlarda qaldırıb”.

Dövlətimizin başçısı Ordu quruculuğu sahəsinin bu gün lazımi səviyyədə təmin edildiyini və bundan sonra da təmin olunacağını qeyd edib.