Heydər Əliyev Sarayı ilə Dövlət Kreml Sarayı arasında əməkdaşlıq əlaqələri genişlənir
Bakı, 30 dekabr, AZƏRTAC
Dekabrın 30-da Heydər Əliyev Sarayının direktoru Ramil Qasımov və Dövlət Kreml Sarayının baş direktoru və bədii rəhbəri Pyotr Şaboltay arasında videokonfrans formatında görüş keçirilib.
AZƏRTAC xəbər verir ki, Ramil Qasımov qonağı salamlayaraq görüşün əhəmiyyətindən danışıb. İki ölkə arasında olan dostluq münasibətlərinin, mədəniyyət sahəsindəki münasibətlərin yüksək səviyyədə olması və dünyada pandemiya bitdikdən sonra yaxın əməkdaşlıq əlaqələrinin qurulması, görkəmli mədəniyyət xadimlərimizin fikir, təcrübə mübadiləsinin vacibliyini vurğulayıb.
Ramil Qasımov qeyd edib ki, qarşıdan gələn 2021-ci ildə Dövlət Kreml Sarayının yubiley ili olması nəzərə alınaraq, birgə əməkdaşlığa dair memorandumun hazırlanması və nəticədə yeni mədəniyyət layihələrinin, yeni əsərlərin, baletlərin, festivalların, mədəniyyət günlərinin, konsertlərin hazırlanıb keçirilməsi prioritet məsələ kimi qarşıya qoyulmalıdır.
Dövlət Kreml Sarayının direktoru Pyotr Şaboltay çıxışında səsləndirilən fikirlərlə razı olduğunu, dəstəklədiyini və gələcəkdə böyük məmnuniyyətlə Kreml Sarayının truppaları ilə Azərbaycana gəlib çıxış etmək istədiklərini bildirib.
Görüşün yekununda tərəflər səmərəli görüşə görə bir-birinə qarşılıqlı olaraq təşəkkürlərini bildiriblər, səsləndirilən təklifləri nəzərdən keçirəcəklərini diqqətə çatdırıblar və qarşıdan gələn 2021-ci yeni təqvim ili münasibətilə təbrik edib, uğurlar diləyiblər.
Qeyd edək ki, Heydər Əliyev Sarayının təşəbbüsü ilə keçirilən videokonfrans formatında görüş ənənəvi hal alacaq və gələcəkdə də dünya səviyyəsində tanınan bir çox teatr-konsert müəssisələrinin rəhbərləri ilə birgə əməkdaşlıq məqsədilə keçiriləcəkdir.
Bölmənin digər xəbərləri
