HİNDİSTAN SƏFİRİ AZƏRBAYCANDA DİPLOMATİK FƏALİYYƏTİNİ BAŞA ÇATDIRMIŞDIR
Hindistanın Azərbaycandakı fövqəladə və səlahiyyətli səfiri Dinkar Xullar ölkəmizdəki diplomatik fəaliyyətini başa çatdırmışdır. Bununla əlaqədar xarici işlər naziri Vilayət Quliyev dekabrın 11-də onu qəbul etmişdir.
Nazirliyin mətbuat xidmətindən AZƏRTAC-a bildirmişlər ki, səmimi keçən söhbət zamanı cənab Dinkar Xullar Hindistanın Azərbaycandakı ilk səfiri kimi işlədiyi müddət ərzində ona göstərilmiş köməyə, habelə səmərəli əməkdaşlığa görə nazir Vilayət Quliyevə minnətdarlıq etmişdir. O, ölkələrimiz arasında əməkdaşlığın bir çox sahələrində irəliləyişin əldə edildiyini bildirmiş, eyni zamanda bu əlaqələrin inkişafı üçün daha böyük imkanların olduğunu vurğulamışdır.
Nazir Vilayət Quliyev Azərbaycan-Hindistan əlaqələrinin genişlənməsində səfirin mühüm rolunu yüksək qiymətləndirmiş və ikitərəfli əməkdaşlığın daha da inkişaf edəcəyinə ümid bəslədiyini bildirmişdir. O, səfirə gələcək fəaliyyətində uğurlar arzulamışdır.
Bölmənin digər xəbərləri
