Hindistanda koronavirus əleyhinə 1 milyard dozadan çox vaksin vurulub
Bakı, 21 oktyabr, AZƏRTAC
Hindistanda COVID-19 əleyhinə vurulan vaksin dozalarının ümumi sayı 1 milyardı keçib. Bu barədə məlumatı Hindistan Hökumətinin Mətbuat İnformasiya Bürosu yayıb.
Hindistanın Baş naziri Narendra Modi bu münasibətlə tviterdə həmyerlilərini təbrik edib və bu möhtəşəm nailiyyətə nail olmaq üçün çalışmış alimlərə və səhiyyə işçilərinə təşəkkürünü bildirib. Ölkənin səhiyyə naziri Mansux Mandaviya da ölkəni bu əlamətdar nailiyyətin əldə edilməsi münasibətilə təbrik edib.
Hindistanın Azərbaycandakı səfirliyindən AZƏRTAC-a bildirilib ki, Hindistanda son 24 saatda 17,561 xəstə sağalıb və pandemiyanın başlanğıcından etibarən xəstəlikdən sağalanların ümumi sayı 33,495,808-ə çatıb.
Beləliklə, Hindistanda xəstələrin koronavirusdan sağalma nisbəti 98,15 faizdir. Sağalma göstəricisi hazırda 2020-ci ilin martından bəri ən yüksək səviyyədədir.
Son 24 saat ərzində ölkədə 18454 yeni yoluxma faktı qeydə alınıb.
Ümumi xəstə sayı 200 mindən az olaraq qalmaqda davam edir. Belə ki, hazırda ölkədə 178,831 koronavirus xəstəsi var.
Ölkədə, həmçinin koronavirus testlərinin aparılma imkanları genişləndirilir. Son 24 saat ərzində ölkədə 1 247 506 koronavirus testi aparılıb. Bu günədək Hindistanda 595.7 milyondan çox test aparılıb.
Bölmənin digər xəbərləri
