Hindistanda xəstəxanada baş verən yanğında 18 koronavirus xəstəsi ölüb
Pekin, 1 may, AZƏRTAC
Hindistanın Qucarat ştatında COVID-19 pasiyentlərinin müalicə aldığı xəstəxanada baş verən yanğında 18 nəfər ölüb.
AZƏRTAC Hindistan mediasına istinadla xəbər verir ki, hadisə Bharuç şəhərindəki xəstəxananın COVID-19 pasiyentlərinin yerləşdirildiyi 4-cü mərtəbəsində gecə saat 1:00 radələrində baş verib. Hadisə yerinə gələn yanğınsöndürənlər xəstəxananın digər mərtəbələrində olan 50 pasiyenti təxliyə ediblər. Onlar ilk olaraq 12 nəfərin meyitini aşkarlayıblar. Axtarış işlərinin gedişində daha 6 meyit tapılıb. Onların bəzisi yanğın xəsarətindən, digərləri isə tüstüdən boğularaq ölüb.
Hələlik yanğının nədən baş verdiyi bilinmir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
