HİNDİSTANIN CƏNUBUNDA İSTİDƏN 600 NƏFƏR HƏLAK OLMUŞDUR
Hindistanın cənubunda havanın həddən çox isti keçməsi bu həftə 622 adamın ölümünə səbəb olmuşdur. Bu barədə qızmar havadan daha çox ziyan çəkmiş Andhra-Pradeş ştatının hakimiyyət orqanları xəbər vermişlər.
İTAR-TASS-ın verdiyi xəbərə görə, istilik bir qədər azalsa da, son günlər havanın hərarəti Selsi ilə 49 dərəcə səviyyəsində qalmaqdadır. Ştatın inzibati mərkəzi olan Heydərabad şəhərinə ölkənin müxtəlif regionlarından qeyri-adi istilərin yeni qurbanları barədə məlumatlar daxil olmaqdadır. Gün vurmasından ölənlərin çoxu kənd sakinləridir. Hindistanın digər cənub və mərkəzi ştatlarındakı kimi, Andhra-Pradeş ştatında da içməli su qıtlığı hiss olunur. Elektrik enerjisi verilməsində fasilələr davam edir. Su elektrik stansiyalarının işini təmin edən su anbarlarında suyun səviyyəsinin aşağı düşməsi nəticəsində elektrik enerjisi istehsalı azalmışdır.
Bölmənin digər xəbərləri
