“Hirkan Milli Parkının florası və bitki örtüyü” kitabı çapdan çıxıb
Bakı, 6 mart, AZƏRTAC
Azərbaycan Milli Elmlər Akademiyasının (AMEA) Mərkəzi Nəbatat Bağının elmi şurasının qərarı ilə “Hirkan Milli Parkının florası və bitki örtüyü” kitabı çapdan çıxıb.
Mərkəzi Nəbatat Bağından AZƏRTAC-a bildirilib ki, nəşrdə Hirkan Milli Parkı təbiət kompleksinin ərazi quruluşu, hidroqrafiyası, iqlimi, torpağı, relyefi, flora və bitki örtüyü ətraflı xarakterizə edilib. Milli Parkın florasının taksonomik tərkibi müəyyənləşdirilib, bitkilərin həyat formaları öyrənilib, coğrafi analizi aparılıb. Tədqiq edilən ərazinin florasında ali bitkilər təhlil olunub, meşə və çəmən bitkilərinin tipləri müəyyənləşdirilib, taksonomik siyahısı hazırlanıb.
Nəşrin müəllifləri biologiya üzrə fəlsəfə doktoru Hacıağa Səfərov və biologiya üzrə elmlər doktoru Vahid Fərzəliyevdir. Kitabın elmi redaktoru Mərkəzi Nəbatat Bağının baş elmi işçisi, AMEA-nın müxbir üzvü Maqsud Qurbanovdur.
Kitab botaniklər, meşə təsərrüfatı mütəxəssisləri, elmi işçilər, doktorantlar, tələbələr, məktəblilər və ümumilikdə təbiəti sevən hər kəs üçün nəzərdə tutulur.
Bölmənin digər xəbərləri
