SİYASƏT
Hiroşima İctimai Universitetinin Sülh Araşdırmalar İnstitutunda Azərbaycanla bağlı təqdimat keçirilmişdir
![](/files/galleryphoto/2013/3/1200x630/14079269305006736628_1200x630.jpg)
![](/files/galleryphoto/2013/3/1200x630/14079269302184864368_1200x630.jpg)
![](/files/galleryphoto/2013/3/1200x630/14079269303520556878_1200x630.jpg)
Tokio, 7 noyabr (AZƏRTAC). Azərbaycanın Yaponiyadakı səfiri Gürsel İsmayılzadə Hiroşima İctimai Universitetinin Sülh Araşdırmalar İnstitutunda ölkəmizə həsr edilmiş təqdimatla çıxış etmişdir.
Səfir Azərbaycanda son illər aparılmış uğurlu islahatlar, ölkə rəhbərliyi tərəfindən görülmüş mühüm işlər nəticəsində respublikamızın sabit siyasi sistemə malik demokratik dövlətə çevrildiyini bildirmişdir. Prezident İlham Əliyevin rəhbərliyi ilə ümumi daxili məhsulun son on ildə bir neçə dəfə artdığı, ölkəyə sərmayə qoyuluşu üçün əlverişli mühitin yaradıldığı diqqətə çatdırılmışdır.
2013-cü il oktyabrın 9-da ölkədə keçirilmiş prezident seçkiləri barədə məlumat verən səfir bu seçkilərin azad, ədalətli və şəffaf şəkildə təşkil edildiyini, bir sıra beynəlxalq təşkilatlar və müstəqil müşahidəçilər tərəfindən yüksək qiymətləndirildiyini qeyd etmişdir. Bildirilmişdir ki, seçkilər demokratik tələblərə uyğun olaraq keçirilmiş, Azərbaycan xalqı səsvermə prosesində fəal iştirak etmiş və seçkilərin müasir texniki təchizatı tam təmin edilmişdir.
G.İsmayılzadə Azərbaycanın tarixi, iqtisadiyyatı, enerji siyasəti, ölkəmizdə həyata keçirilən və nəzərdə tutulan müxtəlif layihələr, son illərdə əldə olunmuş nailiyyətlər barədə də ətraflı danışmışdır. Ölkəmizin dünyanın enerji təhlükəsizliyinin təmin edilməsində oynadığı mühüm rol xüsusi qeyd olunmuşdur. Bundan əlavə, Azərbaycan hökumətinin qeyri-neft sektorunun inkişafına xüsusi diqqət yetirdiyi vurğulanmış, sənaye, turizm, kənd təsərrüfatı, alternativ və bərpa olunan enerji mənbələri sahələrində geniş imkanların mövcudluğu bildirilmişdir.
Təqdimatda Azərbaycanın etibarlı tərəfdaş kimi beynəlxalq münasibətlər sistemində özünü doğrultduğu diqqətə çatdırılmış, ölkəmizin 2012-2013-cü illər üçün BMT Təhlükəsizlik Şurasına qeyri-daimi üzv seçilməsinin bunun bariz nümunəsi olduğu vurğulanmışdır.
Ermənistanın Azərbaycana qarşı hərbi təcavüzü, respublikamızın ərazisinin 20 faizinin ermənilər tərəfindən işğal olunması, bunun nəticəsində bir milyondan çox azərbaycanlının qaçqın və məcburi köçkün vəziyyətinə düşməsi haqqında məlumat verilmişdir.
Tədbirdə Azərbaycanın tarixini və mədəniyyətini, incəsənətini, mətbəxini, milli rəqslərini, xalçalarını, turizm potensialını əks etdirən videofilm nümayiş etdirilmişdir. Filmdə Azərbaycanın palçıq vulkanlarının vətəni olduğu, son illər muğam sənətinə göstərilən qayğı və diqqət, dini tolerantlıq və müxtəlif konfessiyalara məxsus insanların dinc yanaşı yaşaması haqqında ətraflı söhbət açılmışdır.
Sonda G.İsmayılzadə tədbir iştirakçılarının çoxsaylı suallarını cavablandırmışdır.
Təqdimat zamanı yapon dilində nəşr edilmiş “İRS” jurnalının nömrələri iştirakçılara paylanmışdır.
Vüqar Ağayev
AZƏRTAC-ın xüsusi müxbiri
Tokio