DÜNYA
HOLLANDİYA HÖKUMƏTİNİN LAYİHƏLƏRİ UĞURLA HƏYATA KEÇİRİLİR
Respublika Kənd Təsərrüfatı Nazirliyinin Elmi Tədqiqat Tərəvəzçilik İnstitutunda “Abşeron rayonunda faraş kartof istehsalı layihəsi”nin tətbiqinin nəticələrinə həsr olunmuş elmi-praktik seminar keçirilmişdir. Lahiyədən məqsəd Abşeron rayonunda əhalinin gəlirini artırmaq, Bakı və Sumqayıt şəhərlərini ekoloji cəhətdən təmiz kartof məhsulu ilə təmin etmək üçün alim-fermer qarşılıqlı münasibətləri yaratmaqdan ibarətdir.
Kənd təsərrüfatı naziri İrşad Əliyev seminarı acaraq, kartof toxumçuluğunun həllində layihənin səmərəsindən danışdı. Bildirildi ki, Hollandiya hökuməti tərəfindən “Azərbaycanda kartof toxumçuluğunun inkişafı” layihəsi həyata keçirildikdən sonra, yəni 2001-ci ildə ölkəmizdə ilk dəfə olaraq 605 min ton kartof istehsal edilmişdir. Vaxtilə kartof idxal edən Azərbaycan indi Rusiya Federasiyasının bazarlarına həmin məhsulu ixrac imkanlarına malikdir.
Seminardakı çıxışlarda vurğulandı ki, Abşeronda, xüsusən qumsal torpaqlarda ildə hətta iki dəfə kartof məhsulu götürmək mümkündür. Bunun üçün yüksək reproduksiyalı toxum, torpağın əkin üçün hazırlanmasında və becərmə texnologiyalarına yiyələnməkdə aqrar sahə alimləri ilə fermerlərin qarşılıqlı fəaliyyət göstərməsi vacibdir.
Sonra seminar iştirakçıları 30 hektarda müxtəlif kartof sortlarının əkildiyi sahələrə baxmışlar. İlkin proqnoza görə, hər hektardan 300 sentnerdən artıq məhsul gözlənilir.