İCTİMAİ DİNLƏMƏLƏR DAVAM ETDİRİLİR
Ombudsman Aparatından AZƏRTAC-a bildirmişlər ki, müvəkkil Elmira Süleymanova “İnsan hüquqlarının müdafiəsi üzrə Milli Fəaliyyət Planı”nın (MFP) təbliği və tətbiqi vəziyyətinin monitorinqi məqsədilə Cəlilabadda ictimai dinləmələr keçirmişdir.
Tədbirdə rayonun icra hakimiyyəti və bələdiyyələrin, məhkəmə və digər hüquq mühafizə orqanlarının, dairə seçki komissiyalarının, yerli QHT və KİV-lərin, habelə icmaların nümayəndələri iştirak etmişlər.
E.Süleymanova MFP-nin təsdiq edilməsindən ötən müddətdə bu sahədə xeyli iş görüldüyünü, müxtəlif qurumlarla müntəzəm müzakirələr aparıldığını, sənədin tətbiqi ilə bağlı ölkəmizin bütün rayonlarını əhatə etməklə doqquz regionda ictimai dinləmələrin keçirildiyini diqqətə çatdırmışdır. O, insan hüquq və azadlıqları sahəsində qəbul olunmuş qanunlar, digər normativ hüquqi aktlar, aparılan köklü hüquqi islahatlar barədə ətraflı məlumat vermişdir.
Çıxışlarda MFP-də prokurorluq orqanları qarşısında qoyulmuş vəzifələrin icrası istiqamətində görülmüş işlər, vətəndaşlara şəxsiyyət vəsiqəsi verilməsinin vəziyyəti barədə də danışılmışdır.
