“İCTİMAİ FUTBOL TƏŞKİLATLARI” BİRLİYİNİN ÜZVLƏRİ ŞAGİRDLƏRLƏ GÖRÜŞ KEÇİRİBLƏR
Bakı, 29 dekabr (AZƏRTAC). 31 dekabr - Dünya Azərbaycanlılarının Həmrəyliyi Günü və Yeni il münasibətilə “İctimai Futbol Təşkilatları” İctimai Birliyinin üzvləri, veteran futbolçular Nizami rayonunda yerləşən 201 saylı orta məktəbdə təhsil alan şagirdlərlə görüş keçiriblər. Tədbirdə Futbol Veteranları İttifaqının sədri Rasim Zeynalov, qadınlardan ibarət Azərbaycan millisinin baş məşqçisi Şamil Heydərov, veteran futbolçu Musa Qurbanov və ümumittifaq dərəcəli hakim Rüstəm Rəhimov iştirak ediblər. Görüş zamanı məktəbdə təhsil alan şagirdlərə müxtəlif hədiyyələr təqdim olunubdur.
Xatırladaq ki, «Azərbaycan Respublikasında 2005-2015-ci illərdə futbolun inkişafına dair Dövlət Proqramı»na uyğun olaraq, AFFA ilə Təhsil Nazirliyi arasında mövcud əməkdaşlıq müqaviləsi çərçivəsində 201 saylı məktəbdə «Məktəblərdə futbol dərsi» layihəsi həyata keçirilir. Futbol dərsləri V, VI və VII sinif şagirlərinə tədris olunur.
Bölmənin digər xəbərləri
