II KÜLÜLLÜ-KÜRDƏMİR SU KƏMƏRİNİN 8 KİLOMETRİNDƏ İŞLƏR BAŞA ÇATDIRILIB
Rayon icra hakimiyyətində AZƏRTAC-ın müxbirinə bildirmişlər ki, Kürdəmir şəhərinin su təchizatını tamamilə ödəyəcək bu xəttin 8 kilometrlik hissəsində işlər artıq başa çatdırılıb. Bütün işlərə 5 milyard manat (1 milyon AZN) vəsait sərf olunacaqdır. İndiyədək bunun 1 milyard manatı xərclənmişdir.
Layihəyə görə, kəmərin çəkilişi ilə yanaşı şəhərin su təchizatı sistemi də yenidən qurulacaq. Bu istiqamətdə də artıq lazımi tədbirlər görülür. Belə ki, su qülləsindəki nasos stansiyasında nasosların fasiləsiz işini təmin etmək məqsədi ilə yeni elektrik mühərriki quraşdırılmış, M.Əsədov, M.F.Axundov, Ə.Vahid, H.Aslanov, Aşıq Bilal küçələrindəki, “Aran” qəsəbəsindəki borularda əsaslı təmir işləri aparılmışdır.
Qeyd edək ki, şəhərdə əlavə 3 yeni nasos stansiyası qurulacaq, habelə mövcud stansiyalar əsaslı təmir ediləcək, təzə yaşayış massivlərində yeni kəmərlər çəkiləcəkdir.
Bölmənin digər xəbərləri
