İmişli kümçüləri bu il barama istehsalını 17 tona çatdırmağı qarşıya məqsəd qoyublar
İmişli, 10 iyun, Mahir Babayev, AZƏRTAC
Bu il İmişlidə 17 ton barama istehsalı nəzərdə tutulub. Bu məqsədlə 420 qutu ipəkqurdu toxumu gətirilərək müqavilə bağlanılmış kümçülərə paylanılıb.
Respublikada ipəkçiliyin inkişafı ilə bağlı həyata keçirilən tədbirlər nəticəsində rayon baramaçılarının bu sahəyə marağı xeyli artıb. Əgər ötən il İmişlidə 134 ailə ipəkqurdu bəsləyirdisə, bu il onların sayı 163-ə çatıb.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildiriblər ki, ötən il rayonda 9 ton 500 kiloqram barama istehsal olunub. Kümçülər bu il istehsalı artıraraq 17 tona çatdırmağı qarşıya məqsəd qoyublar. Bununla bağlı kümçülər üçün bütün zəruri şərait yaradılıb.
Artıq bir neçə gündür ki, rayonda barama tədarükünə başlanılıb. Kümçülər qısa müddətdə tədarük məntəqəsinə 2 ton 740 kiloqram məhsul təhvil veriblər. Barama tədarükündə rayonun Oruclu, Cəfərli, Gödəktala və Telişli kəndlərinin kümçüləri fərqlənirlər.
Məzrəli kənd sakini Babək Kazımov ötən il 210 kiloqram barama istehsal edərək 1890 manat gəlir götürüb. Kümçü bu il 2 qutu ipəkqurdu toxumu bəsləyib və indiyədək 119 kiloqram barama tədarük edib. Onun dediyinə görə, hələ toplanmamış məhsulu var. Bundan sonra daha 10-15 kiloqram məhsul tədarük edə biləcək.
Bölmənin digər xəbərləri
