ELM VƏ TƏHSİL
İmtahanlarda zal nəzarətçisi olmaq istəyən namizədlərlə müsahibələr davam edir
Bakı, 21 noyabr, AZƏRTAC
Dövlət İmtahan Mərkəzi (DİM) zal nəzarətçisi sertifikatı əldə etmək istəyən namizədlərlə müsahibələri davam etdirir.
Mərkəzdən AZƏRTAC-a bildirilib ki, müsahibələr DİM-in Bakıda yerləşən inzibati binasında və regional bölmə mərkəzlərində DİM-in məsul əməkdaşları tərəfindən aparılır. Müsahibə mərhələsində namizədin sənədləri yoxlanılır, eləcə də təhsili, fəaliyyəti, iş təcrübəsi və digər məlumatları dəqiqləşdirilir. Müsahibənin nəticəsi məqbul və ya qeyri-məqbulla qiymətləndirilir. Namizədlərin nəticələri ilə bağlı məlumatlar elektron poçt ünvanlarına göndərilir.
Müsahibəyə dəvət olunan namizədlərin dekabrın 9-dək qeydiyyatdan keçməməsi zal nəzarətçilərinin fəaliyyətinin sertifikatlaşdırılması prosesində iştirakdan imtina etməsi kimi qiymətləndirilir.
DİM bildirir ki, cari ildə zal nəzarətçisi sertifikatı əldə etmək üçün qeydiyyatdan keçən 2416 namizəd müsahibələrə dəvət olunub və indiyədək onlardan 1066 nəfəri müsahibədə iştirak edib. Müsahibədə iştirak edən namizədlərdən yalnız 691 nəfəri uğurlu nəticə əldə edərək növbəti mərhələyə keçib.
Müsahibə nəticəsi məqbul olan namizədlərin yaxın günlərdə elektron poçt ünvanına psixometriya və ümumi intellekt səviyyəsinin yoxlanılması üçün test imtahanına qeydiyyatla bağlı bildiriş göndəriləcək. Namizədlər elektron anketə daxil olaraq test imtahanının gününü, vaxtını seçir və şəxsiyyət vəsiqələrini təqdim etməklə imtahanda iştirak edəcəklər.
Qeyd edək ki, zal nəzarətçisi sertifikatı əldə etmək üçün elektron qeydiyyat dekabrın 2-də yekunlaşacaq.
Elektron qeydiyyatla bağlı suallar yaranarsa, [email protected] ünvanına yaza və ya DİM-in regional bölmələrinə müraciət etmək olar.
Zal nəzarətçisinin fəaliyyətinin sertifikatlaşdırılması qaydaları DİM-in saytında yerləşdirilib.