İndiyədək 105 könüllü Əmlak Komitəsinin müvafiq qurumlarında fəaliyyətə cəlb olunub
Bakı, 29 may, AZƏRTAC
Əmlak Məsələləri Dövlət Komitəsi (ƏMDK) və Bakı Mühəndislik Universitetinin birgə təşkilatçılığı ilə məzun, tələbə və magistrlərlə “Əmlak Məsələləri Dövlət Komitəsində könüllü fəaliyyət və işə qəbul” mövzusunda görüş keçirilib.
Komitədən AZƏRTAC- bildirilib ki, görüşün məqsədi komitənin fəaliyyəti haqqında informasiya vermək, həyata keçirilən könüllük fəaliyyəti və işə qəbul haqqında məlumatlandırmaqdır. Eyni zamanda, daha çox könüllülərin cəlb edilməsi, gənc məzunların, tələbələrin bilik və bacarıqlarının artırılması üçün universitetlə əlaqələrin genişləndirilməsidir.
Tədbirdə komitənin əməkdaşı təqdimatla çıxış edib. Bildirilib ki, ƏMDK-da könüllülük proqramının həyata keçirilməsi davam edir. Proqram “Könüllü fəaliyyət haqqında” Azərbaycan Respublikasının Qanununa müvafiq olaraq reallaşdırılır. Fəaliyyət müddətinin sonunda könüllülərin nəzəri biliklərini və biliklərini tətbiq etmək bacarıqlarını qiymətləndirmək məqsədilə test imtahanları keçirilir. Topladıqları ballara uyğun olaraq isə onlara müvafiq sertifikatlar verilir. Həmçinin fəaliyyətləri müddətində öhdəliklərini layiqincə yerinə yetirən və intizamlı könüllülərin bir qismi komitənin tabeliyinə daxil olan qurumlarda müvafiq vəzifələrə təyin edilir.
Vurğulanıb ki, komitənin fəaliyyət istiqamətləri üzrə müvafiq xidmət sahələrinə könüllülərin cəlb edilməsi 2017-ci ilin iyul ayından başlanılıb. İndiyədək 105 könüllü komitənin müvafiq qurumlarında fəaliyyətə cəlb olunub. Onlar fəaliyyət göstərdikləri dövrdə müəyyən bilik və bacarıqlara yiyələnib və iş mühitinə adaptasiya olunub. Fəaliyyəti dövründə fərqlənən 36 könüllü komitədə olan müvafiq vakant vəzifələrə təyin edilib.
Qeyd edilib ki, könüllülük fəaliyyəti Azərbaycan Respublikasının qanunvericiliyi ilə qadağan edilməyən işlərin görülməsi və ya xidmətlərin göstərilməsi ilə bağlı ictimai faydalı və gəlirsiz fəaliyyət hesab olunur. Məlumat üçün bildirilir ki, bu fəaliyyətə qoşulmaq istəyənlər komitənin rəsmi “emdk.gov.az” səhifəsindən könüllülük üçün müraciət formasını doldurmalıdır.
Sonda komitədə könüllük fəaliyyəti və işə qəbulla bağlı tələbə və məzunların sualları cavablandırılıb. Qeyd edək ki, gələcəkdə digər universitetlərdə də bu cür tədbirlərin keçirilməsi planlaşdırılır.
Bölmənin digər xəbərləri
