İQTİSADİYYAT
İQTİSADİ ƏMƏKDAŞLIQ TƏŞKİLATININ İCLASI
İyulun 23-25-də İslamabadda İqtisadi Əməkdaşlıq Təşkilatının /İƏT/ üzvü olan ölkələrin kənd təsərrüfatı nazirlərinin birinci iclası keçirilmişdir. İclasda Pakistanın, İranın, Türkiyənin, Əfqanıstanın, Tacikistanın kənd təsərrüfatı nazirləri, Azərbaycanın, Qazaxıstanın, Özbəkistanın, Türkmənistanın, Qırğızıstanın Pakistandakı səfirləri iştirak etmişlər.
Pakistan İslam Respublikasının Prezidenti Pərviz Müşərrəf iclasın açılışında nitq söyləmişdir.
İƏT-in yeni baş katibi Mustafa Ərəstu /İran/ və iştirakçı ölkələrin təmsilçiləri iclasda çıxış etmişlər. Azərbaycanın kənd təsərrüfatı naziri İrşad Əliyevin çıxışının mətni iclas iştirakçılarına paylanmışdır. Ölkəmizin İslamabaddakı səfiri Eynulla Mədətli öz çıxışında həmin mətndə toxunulmuş məsələləri bir daha açıqlamışdır.
İclasın sonunda İƏT-in üzvü olan ölkələrin kənd təsərrüfatı sahəsində əməkdaşlığına dair İslamabad Bəyannaməsi qəbul olunmuşdur.
Pakistan Prezidenti Pərviz Müşərrəf nazirləri və səfirləri qəbul etmişdir. Ölkəmizin səfiri Pakistan Prezidentini Azərbaycan Prezidenti Heydər Əliyevin adından salamlamış, onun respublikamıza qarşıdakı səfərinin səbirsizliklə gözlənildiyini bildirmişdir.
Cənab Pərviz Müşərrəf səmimi salamlarını və xoş arzularını dövlətimizin başçısı Heydər Əliyevə yetirməyi xahiş etmişdir.
İƏT-in üzvü olan ölkələrin kənd təsərrüfatı nazirlərinin ikinci iclası Türkiyədə keçiriləcəkdir.