İQTİSADİ İNKİŞAF NAZİRLİYİNİN MƏLUMATI
Məlumat verildiyi kimi, “Maşınqayırma sənayesi müəssisələrinin özəlləşdirilməsi haqqında” Azərbaycan Respublikası Prezidentinin 22 mart 2001-ci il tarixli Sərəncamının icrasını təmin etmək məqsədi ilə “Azərbaycan Respublikasında dövlət əmlakının özəlləşdirilməsinin II Dövlət Proqramı”na müvafiq olaraq, İqtisadi İnkişaf Nazirliyinin Dövlət əmlakının özəlləşdirilməsi departamenti “Bakı yastıq zavodu” Açıq Səhmdar Cəmiyyətinin səhmlərinin satışı üzrə investisiya müsabiqəsi keçirmişdi.
Müsabiqənin nəticələrinə görə, “Maşservis” Məhdud Məsuliyyətli Cəmiyyəti müsabiqənin qalibi elan olunmuşdu.
İqtisadi İnkişaf Nazirliyinin Dövlət əmlakının özəlləşdirilməsi departamenti və “Maşservis” MMC arasında “Bakı yastıq zavodu” ASC-nin investisiya müsabiqəsində satılmış səhmlərinin alqı-satqı müqaviləsi imzalanmışdır.
Müqaviləyə əsasən, “Maşservis” MMC dövlət büdcəsinə 500 milyon manat köçürməli və 30 min ədəd dövlət özəlləşdirmə çekini nazirliyin Dövlət əmlakının özəlləşdirilməsi departamentinə təqdim etməlidir.
Müsabiqənin qalibi təqdim etdiyi investisiya proqramına əsasən, “Bakı yastıq zavodu” ASC-nin yenidən qurulmasına, yeni texnologiyaların tətbiqinə, məhsul çeşidinin artırılmasına və s. işlərə iki il ərzində 1,7 milyard manat həcmində investisiya qoyuluşunu planlaşdırır.
Bölmənin digər xəbərləri
