İRAN HÖKUMƏTİNİN NÜMAYƏNDƏSİ AZƏRBAYCANLA MÜNASİBƏTLƏRİN İNDİKİ SƏVİYYƏSİNİ YÜKSƏK QİYMƏTLƏNDİRMİŞDİR
İran İslam Respublikası hökumətinin rəsmi nümayəndəsi Abdulla Ramazanzadə ölkənin şimalındakı Ərdəbil şəhərində olarkən bildirmşdir ki, İran və Azərbaycan nümayəndə heyətlərinin qarşılıqlı səfərləri ikitərəfli münasibətləri yaxşlaşdırmaq üçün möhkəm siyasi iradəyə malik olduğuna sübutdur. O, son bir neçə ayda bu münasibətlərin müsbət istiqamətdə inkişaf etməsindən məmnun qaldığını söyləmişdir. Onun fikrincə, istənilən problemlər dinc vasitələrlə, danışıqlar yolu ilə həll edilə bilər, iki ölkə arasındakı kiçik fikir ayrılıqları isə vəziyyəti kəskinləşdirə biləcək amil deyildir.
Ramazanzadə demişdir ki, İran ilə Azərbaycan arasında aparılan danışıqlardan məqsəd müxtəlif məsələləri, o cümlədən Xəzər dənizi ilə bağlı problemi nizama salmaqdır. Bəziləri güman edirlər ki, bu danışıqlar çox uzanmışdır, lakin, şübhəsiz, onlar öz müsbət nəticələrini verəcəkdir.
İTAR-TASS-ın yaydığı xəbərə görə, İran hökumətinin rəsmi nümayəndəsi Azərbaycan Prezidenti Heydər Əliyevin mayda Tehrana rəsmi səfərinin yekunlarını yüksək qiymətləndirmişdir. Ramazanzadə vurğulamışdır ki, bu səfər və onun gedişində imzalanmış sazişlər iki qonşu dövlətin münasibətlərində yeni səhifə açmışdır.
Bölmənin digər xəbərləri
