İRAN OBYEKTLƏRİNƏ ZƏRBƏLƏR ENDİRİLMƏSİ ÖLKƏ İQTİSADİYYATINI İFLİC HALINA SALMAYACAQDIR

11.04.2006 [19:52]
Çap et
A⁺ A^-

AZƏRTAC “Novosti” agentliyinə istinadla xəbər verir ki, İran obyektlərinə endirilə biləcək hərbi zərbələr ölkə iqtisadiyyatını iflic halına salmayacaqdır. Bunu Müasir İranın Öyrənilməsi Mərkəzinin direktoru Rəcəb Səfərov Tehranda olarkən bildirmişdir. O demişdir ki, İrandakı 60-dan çox nüvə obyektinə amerikalılar tərəfindən dəqiq aviazərbələr endirilməsi nəticəsində həmin obyektlərdə çalışan 12-15 min nəfər həlak ola bilər. Onun fikrincə, İranın nüvə probleminin hərbi yolla həlli təqdirində ölkə iqtisadiyyatına böyük ziyan dəyəcəkdir. Lakin İran iqtisadiyyatı iflic halına düşməyəcək və bu, ölkədə siyasi böhrana gətirib çıxarmayacaqdır. Əksinə, İran xalqı öz siyasi liderləri ətrafında daha sıx birləşəcək, İran bütün beynəlxalq hüquqi qurumlardan çıxacaq və nüvə proqramını tam miqyasda inkişaf etdirməyə başlayacaqdır. Bundan başqa, İran cavab tədbiri olaraq öz neftinin ixracını da dayandıracaqdır.

Mərkəzin direktoru bildirmişdir ki, İran iqtisadiyyatının 6 ay üçün xüsusi ehtiyatı var. Bu dövr ərzində İran nefti ixrac olunmasa, Qərb iqtisadiyyatı böyük çətinliklərlə üzləşə bilər. İlk raket zərbələrindən sonra İran 50 kilometrlik Hörmüz boğazını bağlayacaqdır. Dünyada ixrac olunan neftin beşdə bir hissəsi bu boğaz vasitəsilə nəql edilir.

İran ABŞ-dan iki yolla - dünya iqtisadi proseslərində qlobal böhranın yaradılması və ABŞ-ın regionda başlıca müttəfiqi olan İsrailə ziyan vurulması yolları ilə qisas ala bilər. İranın, bundan başqa, nə texniki, nə də siyasi cəhətdən əlindən heç nə gəlməyəcəkdir.

Ekspertin fikrincə, İranın nüvə problemi ətrafinda ciddi qlobal münaqişənin yarana biləcəyi ehtimalı çox böyükdür və böhranın asanlıqla aradan qaldırılacağına ümid azdır. Böhranlı vəziyyətin həllinin yeganə yolu İranla razılığa gəlməkdir. Lakin tərəflər arasındakı siyasi fikir ayrılığı bunu çətinləşdirir.

İRAN OBYEKTLƏRİNƏ ZƏRBƏLƏR ENDİRİLMƏSİ ÖLKƏ İQTİSADİYYATINI İFLİC HALINA SALMAYACAQDIR

MÜƏLLİFLƏ ƏLAQƏ

Bölmənin digər xəbərləri