İRAN PREZİDENTİ URANI XARİCDƏ SAFLAŞDIRMAĞIN ƏLEYHİNƏDİR
AZƏRTAC İRNA agentliyinə istinadla xəbər verir ki, fevralın 2-də İran Prezidenti Mahmud Əhmədinejad uranın saflaşdırılması üçün Rusiya ərazisində müştərək müəssisə yaradılması barədə Moskvanın irəli sürdüyü təklifi rədd etmişdir.
İran rəhbəri demişdir: “Siz bizə uranı saflaşdırmaq işinin xaricdə aparılmasını təklif edərək, elə düşünürsünüz ki, qarşınızdakı orta əsr ölkəsidir. Deyək ki, biz razılaşdıq. Günlərin birində siz bizə nüvə yanacağı göndərməsəniz, bəs onda biz nə edəcəyik?”.
Əhmədinejad “etimadın möhkəmlənməsi üçün konkret addımlar atmaq və uranın saflaşdırılması ilə bağlı işlər üzərində moratoriuma qayıtmaq” barədə BAEA-nın baş direktoru Məhəmməd əl-Baradeinin çağırışını şərh edərək bildirmişdir ki, “uranın saflaşdırılması nüvə enerjisinin əsasını təşkil edir”. Onun sözlərinə görə, “düşmənlər İranı öz qanuni hüquqlarından məhrum etməyə, sonra da nüvə enerjisini ona yüksək qiymətlərlə satmağa çalışırlar.
İran öz yolu ilə getməkdə davam edəcək və öz qanuni hüququndan heç bir halda imtina etməyəcəkdir”.
Bölmənin digər xəbərləri
