İRAN TONİ BLEYERİ XOLOKOSTA DAİR KONFRANSA DƏVƏT EDİR
İran XİN-in rəsmi nümayəndəsi Həmid Rza Asəfi demişdir: “Tehranda keçiriləcək Xolokosta dair konfransda iştirak etmək cənab Bleyer üçün pis olmazdı. O, məqalə də hazırlaya bilər. Əgər o, məqalədə Xolokostla bağlı fikirləri qorumaq istəsə, bunu da edə bilər. Başqalarının onun nöqteyi-nəzəri ilə tanış ola bilməsi üçün biz ona öz məqaləsini oxumağa vaxt verərik. Konfransı yazda keçirmək nəzərdə tutulur”.
Britaniyanın Tehrandakı səfirliyinin nümayəndəsi Baş nazirin konfransda iştirakının mümkünlüyü barədə mövqeyini açıqlamaqdan imtina etmiş, lakin İran hökumətindən rəsmi dəvət alınarsa, onu Bleyerə çatdırmağa söz vermişdir.
Britaniya hökumətinin başçısı qarşıdakı konfrans barədə artıq tənqidi fikir söyləyərək, onu “şok doğuran və mənasız” adlandırmışdır. O həmçinin bildirmişdir ki, İran Prezidenti Mahmud Əhmədinejad “Avropa ölkələrinə gəlib, Xolokostda sübutları öz gözləri ilə görməlidir”.
Bundan əvvəl İranın xarici işlər naziri bir qrup “müstəqil müstəntiqi” Avropadakı keçmiş nasist ölüm düşərgələrinə göndərmək istədiyini söyləmişdi. Onun fikrincə, qrup “cinayətlər törədənlərə eyni dərəcədə rəğbət bəsləməyənlərdən və sionist rejiminin (yəni İsrailin) nümayəndələrindən” ibarət olmalıdır.
Bölmənin digər xəbərləri
